ராகுல் பேச்சால் அதிர்ச்சி: 5 லிட்டர் பாலைக் கொட்டியதற்கு இழப்பீடு கோரி வழக்கு!

பாட்னா : ராகுல் காந்தியின் பேச்சைக் கேட்டதால் தனக்கு ரூ.250 நஷ்டம் ஏற்பட்டிருப்பதாகக் கூறி அதற்கான இழப்பீட்டை பெற்றுத்தரக் கோரி, பிகார் மாநிலத்தைச் சேர்ந்ததொரு நபர் நீதிமன்றத்தில் மனு தாக்கல் செய்துள்ளார்.

முன்னதாக, தில்லியில் கடந்த வாரம் நடைபெற்ற காங்கிரஸ் கட்சியின் புதிய தலைமை அலுவலகம் திறப்பு விழாவில் பேசிய அக்கட்சியின் தலைவர் ராகுல் காந்தி, ‘நாட்டின் ஒவ்வொரு நிா்வாக அமைப்பையும் பாஜக மற்றும் ஆா்எஸ்எஸ் கைப்பற்றிவிட்டது.

எனவே, பாஜக, ஆா்எஸ்எஸ் மட்டுமன்றி இந்திய அரசுக்கு எதிராகவும் நாங்கள் போராடுகிறோம்’ என்றாா். இந்தக் கருத்துகளை முன்வைத்து, ராகுல் காந்தியை பாஜக கடுமையாக விமா்சித்து வருகிறது.

இந்த நிலையில், மக்களவை எதிர்க்கட்சி தலைவர் ராகுல் காந்தி கடந்த வாரம் பேசியதைக் கேட்ட அதிர்ச்சியில், தான் கையில் வைத்திருந்த 5 லிட்டர் பாலைக் கொட்டிவிட்டேன் என்று பாதிக்கப்பட்டுள்ள முகேஷ் சௌத்ரி மனு தாக்கல் செய்துள்ளார்.

பிகார் மாநிலம் சமஸ்திபூர் மாவட்டத்தில் இந்த விநோதம் அரங்கேறியுள்ளது.

இது குறித்து, சோனுபூர் கிராமத்தைச் சேர்ந்த முகேஷ் சௌத்ரி கூறியிருப்பதாவது, “நான் வாளியில் பிடித்து வைத்திருந்த 5 லிட்டர் பால் முழுவதும் கொட்டி வீணாகிவிட்டது. பால் விலை லிட்டருக்கு ரூ. 50. எனக்கு ரூ. 250 நஷ்டம் ஏற்பட்டுள்ளது. ராகுல் காந்தி நாட்டின் இறையாண்மைக்கு அச்சுறுத்தலாக உள்ளார்” என்று கூறியுள்ளார்.

இது தொடர்பாக, ரோசெரா மண்டலத்துக்குள்பட்ட சிவில் நீதிமன்றத்தில் தான் புகாரளித்துள்ள மனுவின் நகலையும் அவர் பொது வெளியில் வெளிப்படுத்தியுள்ளார். அதில், பாரதீய நியாய சம்ஹிதா (பிஎன்எஸ்) சட்டங்களில் வரையறுக்கப்பட்டுள்ள 152-ஆவது பிரிவு உள்ளிட்ட சில பிரிவுகளின்கீழ் ராகுல் காந்தி மீது வழக்குப்பதிய கோரியுள்ளார்.

எனினும், இந்த மனு விசாரணைக்காக நீதிமன்றத்தால் எடுத்துக்கொள்ளப்படுமா என்ற சந்தேகமும் நிலவுகிறது.