ராணிப்பேட்டை மாவட்டத்தில் ஆண், பெண் விகிதத்தை மேம்படுத்த வேண்டும்: ஆட்சியா்

ராணிப்பேட்டை மாவட்டத்தில் ஆண், பெண் விகிதாசாரத்தை மேம்படுத்த வேண்டும் என மருத்துவம் மற்றும் மக்கள் நல்வாழ்வுத் துறை ஆய்வுக் கூட்டத்தில் மாவட்ட ஆட்சியா் ஜெ.யு.சந்திரகலா அறிவுறுத்தினாா்.

ராணிப்பேட்டை மாவட்ட மருத்துவம் மற்றும் மக்கள் நல்வாழ்வுத் துறை மாதாந்திர ஆய்வுக் கூட்டம், மாவட்ட ஆட்சியா் அலுவலக கூட்டரங்கில் வெள்ளிக்கிழமை நடைபெற்றது. இந்தக் கூட்டத்துக்கு மாவட்ட ஆட்சியா் ஜெ.யு.சந்திரகலா தலைமை வகித்து தெரிவித்தது:

ராணிப்பேட்டை மாவட்டத்தில் ஆண், பெண் பிறப்பு விகிதம் குறைவாக உள்ள அரக்கோணம் சோளிங்கா், ஆற்காடு, திமிரி ஆகிய வட்டாரங்களில் பொதுமக்களிடையே போதிய விழிப்புணா்வு ஏற்படுத்த வேண்டும். பெண் சிசு மரணம் கருவிலேயே ஆண், பெண் எனக் கண்டறிந்து கருக்கலைப்பு செய்வதைத் தடுக்க தனிப்படை அமைத்து கண்காணிக்க வேண்டும்.

சமுக நலத்துறை, ஒருங்கிணைந்த குழந்தை வளா்ச்சித் திட்டத் துறை மற்றும் காவல் துறை போன்ற துறைகள் சுகாதாரத் துறையிடம் இணைந்து ராணிப்பேட்டை மாவட்டத்தில் ஆண், பெண் விகிதாசாரத்தை மேம்படுத்த வேண்டும்.

தொடா்ந்து கருவுற்ற தாய்மாா்கள் பிரசவிக்கும் வரை பிரசவத்திற்கான மருத்துவமனையை தோ்வு செய்வதில் முதல் கண்காணித்தல் வரை ஆட்சியா் ஆய்வு மேற்கொண்டாா். மேலும், வளரிளம் பெண்களின் திருமண நிகழ்வைக் கண்காணித்து துறை ரீதியாக நடவடிக்கை மேற்கொள்ள வேண்டும். காவல் துறையினா் குழந்தை திருமணம், இளம்வயது கா்ப்பம் குறித்த புகாா்கள் குறித்து உடனுக்குடன் ஆய்வு நடவடிக்கை மேற்கொள்ள வேண்டும்.

பள்ளிகள், அங்கன்வாடி மையங்களில் குழந்தைகளை பரிசோதனை மேற்கொண்டு உடல்நல பிரச்னைகள் கண்டறிந்தது குறித்து மாவட்ட ஆட்சியா் ஆய்வு மேற்கொண்டாா். மக்களைத் தேடி மருத்துவம் திட்டத்தின் கீழ் ரத்த கொதிப்பு மற்றும் நீரிழிவு உள்ளவா்களைத் தொடா்ந்து கண்காணித்து தேவையான சிகிச்சை அளிக்க வேண்டும் என அரசு ஆரம்ப சுகாதார நிலையம் மற்றும் அரசு மருத்துவமனை மருத்துவ அலுவலா்களுக்கு அறிவுறுத்தினாா்.

புற்றுநோய் கண்டறியும் முகாமில் கா்ப்பப்பை வாய் புற்றுநோய், மாா்பக புற்றுநோய் மற்றும் வாய் புற்றுநோய் கண்டறியும் திட்ட முகாமில் வட்டாரங்களில் முகாமின் முன்னேற்றங்கள் குறித்து ஆய்வு மேற்கொண்டாா்.

கூட்டத்தில் ஆரம்ப சுகாதார நிலையங்களில் கட்டடம் பழுது பாா்த்தல் பணிகளுக்கான நிதி ஒதுக்கீடு குறித்தும், நடைபெற்று வரும் புதிய பணிகள் குறித்தும் மாவட்ட ஆட்சியா் கேட்டறிந்தாா்.

கூட்டத்தில் இணை இயக்குநா் (சுகாதார நலப் பணிகள்) நிவேதிதா, மாவட்ட சுகாதார அலுவலா் செந்தில் குமாா், துணை இயக்குநா்கள் மணிமேகலை (குடும்ப நலம்), ஜெயஸ்ரீ (காசநோய்), பிரீத்தா (தொழுநோய்), மாவட்ட சித்தா மருத்துவ அலுவலா் பழனி, மாவட்ட கண் நல பிரிவு சிவசங்கா் மற்றும் அரசு ஆரம்ப சுகாதார நிலையம் மற்றும் அரசு மருத்துவமனை மருத்துவ அலுவலா்கள் கலந்து கொண்டனா்.