வடமாநில தொழிலாளா்களை தினமும் கண்காணிக்க வேண்டும் என திருச்செங்கோடு காவல் துணைக் கண்காணிப்பாளா் கிருஷ்ணன் தெரிவித்தாா்.
பள்ளிபாளையம், வெப்படை, ஆனங்கூா் ஆகிய சுற்றுவட்டாரத்தில் 100-க்கும் மேற்பட்ட நூற்பாலைகள் உள்ளன. இங்கு வடமாநில தொழிலாளா்கள் ஏராளமானோா் பணிபுரிந்து வருகின்றனா். அவா்கள் வாடகைக்கு அறை எடுத்தும், சிலா் நூற்பாலை வளாகத்திலும் தங்கியுள்ளனா். கடந்த சில மாதங்களாக வடமாநில தொழிலாளா்களால் குற்றச்செயல்கள் அதிகரித்து வருகின்றன.
இந்நிலையில், வடமாநில தொழிலாளா்கள் குறித்த ஆலோசனைக் கூட்டம் தனியாா் திருமண மண்டபத்தில் அண்மையில் நடைபெற்றது. இதில், திருச்செங்கோடு காவல் துணைக் கண்காணிப்பாளா் கிருஷ்ணன் தலைமையில், பள்ளிபாளையம் காவல் ஆய்வாளா் (பொ) தீபா முன்னிலையில் நடைபெற்ற கூட்டத்தில், பள்ளிபாளையம் வட்டார நூற்பாலை உரிமையாளா்கள் மற்றும் சங்க நிா்வாகிகள் கலந்துகொண்டனா்.
இதில், காவல் துணைக் கண்காணிப்பாளா் கூறியதாவது: வடமாநில தொழிலாளா்களை பணியில் அமா்த்தும்போது, அவா்களுடைய விவரம், முகவரி போன்றவற்றை பதிவுசெய்ய வேண்டும். தினமும் வேலைக்கு வரும்போது அவா்களை சோதனை செய்ய வேண்டும்.
நூற்பாலையில் பணிபுரியும் வடமாநில தொழிலாளா்களுக்கு, அடையாள அட்டை வழங்க வேண்டும். அதில் கைப்பேசி எண், நிறுவனத்தின் பெயா், விவரங்கள் தெளிவாக இருக்க வேண்டும். நூற்பாலையின் உள்ளேயும், வெளியேயும் கண்காணிப்பு கேமரா வைக்க வேண்டும்.
வட மாநில தொழிலாளா்கள் நடவடிக்கையில் சந்தேகம் ஏற்பட்டால், காவல் துறைக்கு தகவல் தெரிவிக்க வேண்டும் என்றாா்.
