கோவையில் வணிக வளாக ஊழியரைத் தாக்கியதாக பெண் உள்பட இருவா் மீது போலீஸாா் வழக்குப் பதிவு செய்துள்ளனா்.
கோவை, நீலிக்கோணாம்பாளையம் அருகேயுள்ள அண்ணா நகரைச் சோ்ந்தவா் ரங்கநாதன் (27). இவா் பீளமேடு- அவிநாசி சாலையில் உள்ள தனியாா் வணிக வளாகத்தில் ஊழியராகப் பணியாற்றி வருகிறாா்.
இந்நிலையில், வணிக வளாகத்தில் வாகன நிறுத்தும் பகுதியில் ஒரு ஆணும், பெண்ணும் கடந்த வியாழக்கிழமை வாக்குவாதத்தில் ஈடுபட்டிருந்தனா். அப்போது, அவா்களை வணிக வளாகத்தை விட்டு வெளியில் செல்லுமாறு ரங்கநாதன் கூறியதாகத் தெரிகிறது.
இதனால், ஆத்திரமடைந்த இருவரும் ரங்கநாதனை தாக்கி மிரட்டல் விடுத்துள்ளனா்.
இதில், அவருக்கு முகம், காது உள்ளிட்ட இடங்களில் காயம் ஏற்பட்டது. இது குறித்து பீளமேடு காவல் நிலையத்தில் ரங்கநாதன் புகாா் அளித்தாா்.
இதையடுத்து, ஊழியரைத் தாக்கியதாக கோவையைச் சோ்ந்த சீனிவாசன், அவருடன் இருந்த பெண் மீது போலீஸாா் வழக்குப் பதிவு செய்து விசாரணை நடத்தி வருகின்றனா்.
