தூத்துக்குடி துறைமுக கப்பல் தளத்தில் சரக்குகளை எடுத்து செல்லும் வாகனம் மோதி விபத்துக்குள்ளானதில் தனியாா் ஏற்றுமதி நிறுவன ஊழியா் வெள்ளிக்கிழமை உயிரிழந்தாா்.
தூத்துக்குடி பொட்டல்காடு பகுதியைச் சோ்ந்த தங்கம் மகன் ஜெயம் (49). இவா் தூத்துக்குடி, புதிய துறைமுகத்தில் உள்ள தனியாா் ஏற்றுமதி நிறுவனத்தில் பணியாளராக வேலை பாா்த்து வந்தாா்.
இந்நிலையில், துறைமுகத்தின் 3ஆவது தளத்தில் நின்றிருந்த கப்பலில் இருந்து உரம் இறக்கும் பணி நடைபெற்று கொண்டிருந்தது. அப்போது, உரத்தை எடுத்து வந்த வாகனம் இவா் மீது மோதியதில் சம்பவ இடத்திலேயே ஜெயம் உயிரிழந்தாா்.
சம்பவ இடத்துக்கு வந்த போலீஸாா் ஜெயத்தின் சடலத்தைக் கைப்பற்றி உடல்கூறாய்வுக்காக தூத்துக்குடி அரசு மருத்துவக் கல்லூரி மருத்துவமனைக்கு அனுப்பி வைத்தனா்.
மேலும், இதுகுறித்து போலீஸாா் வழக்குப் பதிந்து விசாரித்து வருகின்றனா்.
