புதுக்கோட்டை மாவட்டத்தில் சனிக்கிழமை நடைபெற்ற வாக்காளா் பட்டியல் சுருக்க முறைத் திருத்தப் பணிகளை மாவட்டப் பாா்வையாளரும், எழுதுபொருள் - அச்சுத் துறை ஆணையருமான வே. ஷோபனா நேரில் பாா்வையிட்டு ஆய்வு செய்தாா்.
இந்தியத் தோ்தல் ஆணையத்தின் அறிவுரைப்படி நவ. 16, 17, 23 மற்றும் 24 ஆகிய சனி மற்றும் ஞாயிற்றுக்கிழமைகளில் வாக்காளா் பட்டியல் சுருக்கமுறைத் திருத்தப் பணிகள் நடைபெறுகின்றன.
புதுக்கோட்டை மாவட்டத்திலுள்ள 6 சட்டப்பேரவைத் தொகுதிகளுக்குள்பட்ட 1561 வாக்குச்சாவடிகளிலும் நடைபெறும் இந்தப் பணிகளில், வாக்காளா் பட்டியலில் பெயா் சோ்த்தல், நீக்குதல் உள்ளிட்ட திருத்தங்களை மேற்கொள்வதற்கான விண்ணப்பங்கள் வழங்கப்படுகின்றன.
இப்பணிகளை நேரில் பாா்வையிட்டு ஆய்வு செய்வதற்காக பாா்வையாளராக நியமிக்கப்பட்டுள்ள மாநில எழுதுபொருள் மற்றும் அச்சுத்துறை ஆணையா் வே. ஷோபனா சனிக்கிழமை புதுக்கோட்டை வந்தாா்.
புதுக்கோட்டை மாவட்டத்தில், அம்மாசத்திரம் அரசு தொடக்கப் பள்ளி, ஆயிங்குடி அரசுத் தொடக்கப் பள்ளி, மறவப்பட்டி அரசுப் பள்ளி, முசிதமு சிதம்பரம் செட்டியாா் பள்ளி ஆகிய மையங்களில் நடைபெற்ற பணிகளை அவா் பாா்வையிட்டு ஆய்வு செய்தாா்.
மேலும், மாவட்ட ஆட்சியா் அலுவலக வளாகத்தில் நடைபெற்ற ஆய்வுக் கூட்டத்திலும் அவா் பங்கேற்று ஆலோசனைகளை வழங்கினாா்.
ஆய்வின்போது, மாவட்ட ஆட்சியா் மு. அருணா, மாவட்ட வருவாய் அலுவலா் அ.கோ. ராஜராஜன், வருவாய்க் கோட்டாட்சியா்கள் பா. ஐஸ்வா்யா (புதுக்கோட்டை), அ. அக்பா்அலி (இலுப்பூா்), ச. சிவகுமாா் (அறந்தாங்கி), தோ்தல் தனி வட்டாட்சியா் அ. சோனை கருப்பையா உள்ளிட்டோா் உடனிருந்தனா்.
ஆய்வுக் கூட்டத்தில், அங்கீகரிக்கப்பட்ட அரசியல் கட்சிகளின் மாவட்டப் பிரதிநிதிகள் பங்கேற்றனா்.
