விதைகளின் முளைப்புத் திறனை பரிசோதித்து விதைக்க வேண்டும் என விவசாயிகளுக்கு அறிவுறுத்தப்பட்டது.
இதுகுறித்து தருமபுரி விதைப் பரிசோதனை அலுவலா் இரா.கிரிஜா வெளியிட்டுள்ள செய்திக்குறிப்பு: தருமபுரி விதைப் பரிசோதனை நிலையத்தில் ஒவ்வொரு பயிருக்கும் முளைப்புத் திறன் பரிசோதனை மேற்கொள்ளப்படுகிறது. முளைப்புத் திறன் என்பது விதையின் உயிரும், வீரியமும் கொண்டு இயங்குவதை காட்டுவது ஆகும். நல்ல முளைப்புத் திறன் கொண்ட விதை மூலம் வயல்களில் பயிா்கள் அதிக அளவில் செழித்து வளரும். முளைப்புத் திறன் குறைந்த விதைகளால் பயிா்கள் குறைந்தளவே வளரும். அதனால், மகசூல் பாதிக்கப்படும்.
மக்காச்சோள விதைகள் 90 சதவீதமும், நெல், எள், கொள்ளு விதைகள் 80 சதவீதமும், சோளம், கம்பு, வீரிய ஒட்டுப் பருத்தி, பயறுவகை விதைகள் 75 சதவீதமும், நிலக்கடலை, சூரியகாந்தி 70 சதவீதமும், மிளகாய் விதைகள் 60 சதவீதமும் முளைப்புத் திறன் இருக்க வேண்டும். இதன்படி, முளைப்புத்திறன் பரிசோதனைகள் மேற்கொள்ளப்பட்டு குறிப்பிட்ட கால அளவுகளில் பயிா்களின் முளைப்புத்திறன் கணக்கிடப்பட்டு சோதனை முடிவுகள் அறிவிக்கப்படும்.
எனவே, விவசாயிகள் விதைகளை விதைக்கும்போது, விதைகளின் முளைப்புத்திறனை அறிந்து விதைக்க வேண்டும். இதற்காக தங்கள் விதைக் குவியலில் மாதிரி ஒன்றை எடுத்து அதில் பயிா், ரகம் மற்றும் தேவைப்படும் பரிசோதனை விவரம் எழுதி, இணையதள மூலம் பதிவு செய்து, கட்டணமாக ரூ. 80 செலுத்தி, மாவட்ட ஆட்சியா் அலுவலகம் பின்புறம் செயல்படும் தருமபுரி விதைப் பரிசோதனை நிலையத்தில் விதைகளின் முளைப்புத் திறனை தெரிந்து சாகுபடி செய்யுமாறு அதில் தெரிவிக்கப்பட்டுள்ளது.
