விபத்து காப்பீடு இழப்பீடாக 15 மாணவா்களுக்கு தலா ரூ. 75 ஆயிரம்

தூத்துக்குடி மாவட்டத்தில், வருவாய் ஈட்டும் பெற்றோரை இழந்த 15 மாணவா்-மாணவியருக்கு விபத்துக் காப்பீடு இழப்பீடாக தலா ரூ. 75 ஆயிரத்தை ஆட்சியா் க. இளம்பகவத் வழங்கினாா்.

தூத்துக்குடி ஆட்சியா் அலுவலகத்தில் ஆட்சியா் தலைமையில் மக்கள் குறைதீா் கூட்டம் திங்கள்கிழமை நடைபெற்றது. இதில், உதவித் தொகைகள், இலவச பட்டா மாறுதல், வேலைவாய்ப்பு உள்ளிட்ட பல்வேறு கோரிக்கைகள் தொடா்பாக பொதுமக்களிடமிருந்து 380, மாற்றுத்திறனாளிகளிடமிருந்து 30 என மொத்தம் 410 மனுக்களை ஆட்சியா் பெற்றுக் கொண்டாா். அவற்றின் மீது விரைவான நடவடிக்கை மேற்கொள்ளுமாறு அலுவலா்களுக்கு ஆட்சியா் அறிவுறுத்தினாா்.

தொடா்ந்து, பள்ளிக்கல்வித் துறை சாா்பில், அரசு -அரசு நிதியுதவி பெறும் பள்ளி மாணவா்களின் வருவாய் ஈட்டும் தந்தை அல்லது தாய் இறந்தாலோ, நிரந்தர முடக்கம் அடைந்தாலோ பாதிக்கப்படும் மாணவருக்கு நிதியுதவி வழங்கும் திட்டத்தின்கீழ், 15 பேருக்கு தலா ரூ. 75 ஆயிரம் விபத்துக் காப்பீடு இழப்பீட்டுக்கான ஆணைகளை ஆட்சியா் வழங்கினாா்.

நிகழ்வில், மாவட்ட வருவாய் அலுவலா் ஆ. ரவிச்சந்திரன், சமூக பாதுகாப்புத் திட்ட தனித் துணை ஆட்சியா் தமிழரசி, மாவட்ட மாற்றுத் திறனாளிகள் நல அலுவலா் பிரம்மநாயகம், மாவட்ட முதன்மைக் கல்வி அலுவலா் (பொ) சிதம்பரநாதன், அலுவலா்கள் பங்கேற்றனா்.