விரகனூா் சுற்றுச்சாலையில் உயா்நிலைப் பாலம் அமைக்கப்படுமா?

மதுரை அருகே விரகனூா் சுற்றுச் சாலை பகுதியில் உயா்நிலைப் பாலம் அமைக்க வேண்டும் என பொதுமக்கள், வாகன ஓட்டிகள் கோரிக்கை விடுத்தனா்.

கல்வி, தொழில், வேலைவாய்ப்பு, வா்த்தகம், மருத்துவச் சேவை உள்ளிட்ட பல்வேறு துறைகளில் வளா்ந்து வரும் நகரமாக மதுரை திகழ்கிறது. அதுமட்டுமன்றி, தென் மாவட்டங்களின் வளா்ச்சிக்கு மைய நகரமாகவும் மதுரை திகழ்கிறது. இந்த நிலையில், வா்த்தகப் போக்குவரத்தை மேம்படுத்த பல்வேறு திட்டங்கள் செயல்படுத்தப்பட்டன.

குறிப்பாக, தென் மாவட்டங்களான விருதுநகா், திருநெல்வேலி, தூத்துக்குடி, தென்காசி, கன்னியாகுமரி ஆகிய மாவட்டங்களிலிருந்து மதுரை வழியாக திருச்சி, விழுப்புரம், சென்னை உள்ளிட்ட வட மாவட்டங்களை இணைக்கும் வகையில் கடந்த 2010 -ஆம் ஆண்டில் மதுரை தூத்துக்குடி 4 வழிச் சாலைத் திட்டப் பணிகள் நிறைவு பெற்று பொதுமக்கள் பயன்பாட்டுக்கு கொண்டு வரப்பட்டன.

இதே போன்று, சுற்றுலாத் தலமாக திகழும் ராமநாதபுரம் மாவட்டம், தனுஷ்கோடி வரை 4 வழிச் சாலை அமைப்பதற்கு கடந்த 2016- ஆம் ஆண்டு ரூ. 1,250 கோடி மதிப்பிலான திட்டத்துக்கு ஒப்புதல் பெறப்பட்டது. முதல் கட்டமாக, மதுரை முதல் பரமக்குடி வரை ரூ. 937 கோடி மதிப்பில் 4 வழிச் சாலை அமைக்கப்பட்டு, பொதுமக்கள் பயன்பாட்டுக்கு திறக்கப்பட்டது. மீதமுள்ள பகுதிகளில் 4 வழிச் சாலை அமைக்கும் பணிக்கு நிலம் கையகப்படுத்துதல் உள்ளிட்ட ஆரம்பகட்டப் பணிகள் நடைபெற்று வருகின்றன.

இதுதவிர, மதுரை மாநகரில் வைகையாற்றின் தென் கரையில் ஆரப்பாளையம் அருகே உள்ள காமராஜா் உயா்நிலைப் பாலம் முதல் விரகனூா் சுற்றுச் சாலை வரையும், வட கரையைப் பொறுத்தவரை வண்டியூா் முதல் விளாங்குடி சந்திப்பு வரை கரையின் இரு புறங்களிலும் தலா 8 கி.மீ. தொலைவுக்கு அணுகுச் சாலை அமைக்கப்பட்டது. இந்த திட்டத்தின் கீழ் விடுபட்ட ஓரிரு இடங்களில் இணைப்புச் சாலைகள் அமைக்கும் பணி நடைபெற்று வருகிறது.

இதன் காரணமாக, திண்டுக்கல், கரூா், ஈரோடு, திருப்பூா் ஆகிய மாவட்டங்களிலிருந்து வரும் வாகனங்கள் மாநகருக்குள் செல்லாமல், அணுகுச் சாலை வழியாக வந்து விரகனூா் சுற்றுச் சாலையை அடைந்து அங்கிருந்து சிவகங்கை, ராமநாதபுரம், விருதுநகா், தூத்துக்குடி, திருநெல்வேலி ஆகிய மாவட்டங்களுக்குச் செல்ல முடியும்.

இதேபோன்று, தென் மாவட்டங்களான விருதுநகா், திருநெல்வேலி, ராமநாதபுரம் உள்ளிட்ட பல்வேறு மாவட்டங்களிலிருந்து வரும் வாகனங்கள் விரகனூா் சுற்றுச் சாலையிலிருந்து வைகையாற்றின் கரைகளில் அமைக்கப்பட்டுள்ள அணுகுச் சாலை வழியாக திண்டுக்கல் உள்ளிட்ட மேற்கு தொடா்ச்சி மலை மாவட்டங்களுக்கு செல்ல முடியும்.

சென்னை முதல் தூத்துக்குடி 4 வழிச் சாலை, பரமக்குடி 4 வழிச் சாலை, வைகையாற்றின் கரைகளில் அமைக்கப்பட்டுள்ள அணுகுச் சாலைகளுக்கு மையமாக விரகனூா் சுற்றுச் சாலை அமைந்துள்ளது. இந்த வழித் தடத்தில் நாளுக்கு நாள் போக்குவரத்து அதிகரித்துக் காணப்படுகிறது. எனவே, போக்குவரத்து நெரிசல் ஏற்பட்டு அதிக நேரம் காத்திருக்க வேண்டிய நிலை ஏற்படுகிறது.

ஆகவே, விரகனூா் சுற்றுச் சாலை பகுதியில் சென்னை-தூத்துத்துடி 4 வழிச் சாலை சந்திப்பு, ராமேசுவரம் 4 வழிச் சாலை சந்திப்புகளில் உயா்நிலைப் பாலம் அமைக்க வேண்டும் என பொதுமக்கள், வாகன ஓட்டிகள் கோரிக்கை விடுத்தனா்.

இதுபற்றி பொதுமக்கள் கூறியதாவது : மதுரையிலிருந்து தூத்துக்குடி, மதுரையிலிருந்து பரமக்குடி 4 வழிச் சாலை சந்திப்புகளுக்கு விரகனூா் சுற்றுச் சாலை முக்கிய சந்திப்பு பகுதியாக உள்ளது. அதுமட்டுமன்றி, தூத்துக்குடி சாலையில் மதுரை விமான நிலையம், வேலம்மாள் மருத்துவக் கல்லூரி, வணிக நிறுவனங்கள் செயல்படுகின்றன.

மதுரை- திருச்சி 4 வழிச் சாலையில் பல்வேறு தகவல் தொழில்நுட்ப (ஐ.டி.) நிறுவனங்கள் செயல்படுகின்றன. இதன் காரணமாக, இந்த வழிகளில் வாகனப் போக்குவரத்து அதிகமாக உள்ளது. தற்போது, அரசியல் கட்சிகள் சாா்பில் நடைபெறும் மாநாடுகள் முழுவதும் மதுரை-திருச்சி சாலையில் உள்ள வண்டியூா், சிவகங்கை சந்திப்பு சாலை பகுதிகளில் நடத்தப்படுகின்றன.

இந்த நிகழ்வுகளுக்கு வரும் வாகனங்கள் விரகனூா் சுற்றுச் சாலை வழியாகத் தான் அனுமதிக்கப்படுகின்றன. மேலும், ஆளுநா்கள், அரசியல் கட்சித் தலைவா்கள், முக்கியப் பிரமுகா்கள் வரும் வாகனங்கள் எளிதாகச் செல்வதற்கு விரகனூா் சுற்றுச் சாலைகளில் உள்ள அனைத்துப் பகுதிகளிலும் வாகனங்கள் நிறுத்தப்படுகின்றன.

இதனால், நீண்ட வரிசையில் வாகனங்கள் காத்திருக்க வேண்டிய நிலை ஏற்படுகிறது. ஏறக்குறைய அரை மணி நேரம் முதல் ஒரு மணி நேரம் வரை காத்திருந்து செல்ல வேண்டியுள்ளது. இதனால், அலுவலா்கள், பள்ளி, கல்லூரி மாணவ, மாணவிகள், பொதுமக்கள் குறித்த நேரத்துக்குள் தங்கள் பணிக்குச் செல்ல முடியவில்லை.

குறிப்பாக, நோயாளிகளை ஏற்றி வரும் அவசரச் சிகிச்சை ஊா்தியும் இந்த வாகனப் போக்குவரத்து நெரிசலில் சிக்குகின்றன. இதுதவிர, போதிய தடுப்புகள், முன்னெச்செரிக்கை நடவடிக்கைகள் இல்லாததால் விபத்து ஏற்பட்டு உயிரிழப்புகளும் ஏற்படுகின்றன.

எனவே, போக்குவரத்து நெரிசலைக் குறைக்கும் நோக்கில் மதுரை விரகனூா் சுற்றுச் சாலை பகுதியில் உயா்நிலைப் பாலம் அமைக்க தமிழக அரசு முன் வரவேண்டும் என்றனா்.

இதுகுறித்து மாநில நெடுஞ்சாலைத் துறை பொறியாளா் ஒருவா் கூறியதாவது : திருச்சி-மதுரை 4 வழிச் சாலைத் திட்டப் பணியின் போது விரகனூா் சுற்றுச் சாலை பகுதியில் உயா்நிலைப் பாலம் கட்டுவதற்கு அரசாணை பெறப்பட்டு, நிதியும் ஒதுக்கப்பட்டது.

அப்போது, சுங்கக் கட்டணம் வசூலிக்கும் தனியாா் நிறுவனத்திடம் சாலை பராமரிப்புப் பணிகள் இருந்தன. அவா்களிடமிருந்து ஒப்புதல் பெறப்படவில்லை. எனவே, அந்தத் திட்டம் கைவிடப்பட்டது. தற்போது, விரகனூா் சுற்றுச் சாலை பகுதியில் உயா்நிலைப் பாலம் அமைப்பதற்கு எந்தவித திட்டமும் இல்லை.

எதிா்காலத்தில் அமைக்கப்படுவது குறித்து அரசு தான் முடிவு செய்ய வேண்டும். அரசின் கொள்கை முடிவைப் பொறுத்து உயா்நிலைப் பாலம் அமைக்கலாம் என்றாா் அவா்.