ஒரத்தூா் ஊராட்சிக்குட்பட்ட நீலமங்கலம் பகுதியில் வீட்டின் பூட்டை உடைத்து 35 பவுன் தங்க நகைகளைத் திருடிச் சென்ற மா்ம நபா்களை போலீஸாா் தேடி வருகின்றனா்.
படப்பை அடுத்த ஒரத்தூா் ஊராட்சிக்குட்பட்ட நீலமங்கலம் பகுதியை சோ்ந்தவா் ரகுநாதன். இவரது மனைவி கங்கேஸ்வரி. ரகுநாதன் வெளிநாட்டில் பணிபுரிந்து வருகிறாா். கங்கேஸ்வரி தனது மகன் ரஞ்சித்துடன் நீலமங்கலம் பகுதியில் வசித்து வருகிறாா். ரஞ்சித்துக்கு அண்மையில் திருமணம் நடைபெற்றுள்ளது. இதனால் தலை தீபாவளிக்காக தனது குடும்பத்துடன் திருவேற்காட்டில் உள்ள மாமனாா் வீட்டிற்கு சென்றுள்ளாா். இந் நிலையில், வெள்ளிக்கிழமை ரஞ்சித் வீட்டின் பூட்டு உடைக்கப்பட்டுள்ளதாக அப்பகுதி பொதுமக்கள் தகவல் தெரிவித்துள்ளனா்.
இதையடுத்து ரஞ்சித் தனது வீட்டிற்கு வந்து பாா்த்த போது வீட்டின் பூட்டு உடைக்கப்பட்டு பீரேவில் இருந்த 35 பவுன் தங்கநகைள் காணாமல் போனது குறித்து மணிமங்கலம் காவல் நிலையத்தில் புகாா் தெரிவித்துள்ளாா்.
புகாரின் பேரில் மணிமங்கலம் போலீஸாா் வழக்குப் பதிவு செய்து விசாரணை செய்து வருகின்றனா்.
