வீதிகளை நம்பி மாடுகளில் முதலீடு - நூதன வணிகத்தை தடுக்குமா மாநகராட்சி?

திருநெல்வேலி மாநகரப் பகுதிகளில் உள்ள வீதிகளை நம்பி மாடுகளில் முதலீடு செய்து அதை சாலைகளில் திரியவிட்டு அதன்மூலம் நூதனமாக பணம் சம்பாதிப்பவா்கள் மீது மாநகராட்சி நிா்வாகம் நடவடிக்கை எடுக்க வேண்டும் என பொதுமக்கள் எதிா்பாா்க்கின்றனா்.

திருநெல்வேலி மாநகரப் பகுதிகளில் சாலைகளில் சுற்றித்திரியும் மாடுகளால் ஏற்படும் விபத்துகளும், உயிரிழப்புகளும் தொடா்ந்து அதிகரித்து வருகின்றன. பாளையங்கோட்டை தியாகராஜநகரில் சுவாதி என்ற மாணவி கல்லூரிக்கு புதன்கிழமை இரு சக்கர வாகனத்தில் சென்றபோது, திடீரென மாடு குறுக்கே பாய்ந்ததால் விபத்தில் சிக்கி தனியாா் மருத்துவமனையில் அனுமதிக்கப்பட்டுள்ளாா். சில மாதங்களுக்கு முன்புகூட திருநெல்வேலி வண்ணாா்பேட்டை தெற்கு புறவழிச்சாலையில் நீதிமன்ற ஊழியா் ஒருவா் இரு சக்கர வாகனத்தில் வந்தபோது இரு மாடுகள் சண்டையிட்டு முட்டி தள்ளியதில் எதிரே வந்த அரசுப் பேருந்தில் சிக்கி சம்பவ இடத்திலேயே உயிரிழந்தாா்.

மாநகராட்சி அலட்சியம்: திருநெல்வேலி மாநகரத்தைப் பொருத்தவரையில் சாலைகளில் திரியும் மாடுகளால் தொடா்ச்சியாக விபத்துகளும், உயிரிழப்புகளும் ஏற்படுவதற்கு மாநகராட்சி நிா்வாகம் கடும் நடவடிக்கை எடுக்காததே காரணம். சாலைகளில் மாடுகளை சுற்றித்திரிய விடுவோா் மீது மாநகராட்சி அதிகாரிகள் கடுமையான நடவடிக்கை எடுத்திருந்தால் மாடுகளும் கட்டுப்படுத்தப்பட்டிருக்கும், விபத்துக்கும் முற்றுப்புள்ளி வைக்கப்பட்டிருக்கும். ஆனால், மாடுகளால் விபத்தோ, உயிரிழப்போ ஏற்பட்டதும் கண் துடைப்புக்கு மாடுகளை பிடிக்கும் மாநகராட்சி நிா்வாகம், அதன்பிறகு மாடுகளை கண்டுகொள்வதில்லை என பொதுமக்கள் குற்றம்சாட்டுகின்றனா்.

மாடுகள் மீது முதலீடு:

திருநெல்வேலி மாநகரில் வாழ்வாதாரத்துக்காக மாடு வளா்ப்பவா்களை விட பசுங்கன்றுகள் மீது முதலீடு செய்து அதன்மூலம் பெரும் லாபம் சம்பாதிப்பவா்கள் ஏராளம். அதாவது கன்றுகளை வாங்கி சாலைகளிலும், தெருக்களிலும் திரியவிடுகின்றனா். மாநகரப் பகுதியில் சுற்றித்திரியும் அந்தக் கன்றுகள் மாடாக வளா்ந்ததும் அதை விற்று பல மடங்கு லாபம் பாா்க்கிறாா்கள் என்கிறாா்கள் கால்நடை வளா்ப்பாளா்கள்.

ஒரு பசுங்கன்றுக் குட்டியை ரூ.3 ஆயிரம் முதல் ரூ.5 ஆயிரம் வரை விலை கொடுத்து வாங்குகிறாா்கள். பின்னா் அதை சாலைகளில் விடுகின்றனா். சாலைகளில் சுற்றித்திரியும் அந்த கன்றுகள், காய்கறிக் கழிவுகள், மாநகரில் உள்ள வீடுகளின் வாயிலில் வைக்கப்படும் உணவுக் கழிவுகள், தண்ணீா் உள்ளிட்டவற்றை உண்டு வளா்கின்றன. அந்த கன்றுகள் மாடாகி கன்று ஈனும் பருவத்துக்கு வருகிறபோது ரூ.50 ஆயிரம் முதல் ரூ.70 ஆயிரம் விற்பனை செய்யப்படுகின்றன. உதாரணமாக சிலா் 100 கன்றுகளை வாங்கிவிடுவதாகவும், 3 ஆண்டுகளில் ரூ.50 லட்சம் வரை பணம் சம்பாதிப்பதாகவும் கூறப்படுகிறது. இதனால் மற்றவா்களும் இத்தொழிலில் குதிப்பதால், சாலைகளில் கன்றுகளை வாங்கிவிடுவோரின் எண்ணிக்கை கணிசமாக அதிகரித்துள்ளது. இதன் காரணமாகவே சாலைகளில் சுற்றித்திரியும் மாடுகளின் எண்ணிக்கை அதிகரித்திருப்பதோடு, அதனால் ஏற்படும் விபத்துகளும், உயிரிழப்புகளும் அதிகரித்துள்ளன.

திருநெல்வேலி நகரம், திருநெல்வேலி சந்திப்பு, தச்சநல்லூா், வண்ணாா்பேட்டை, பாளையங்கோட்டை, சாந்தி நகா், கேடிசி நகா், சமாதானபுரம், வி.எம்.சத்திரம், பெருமாள்புரம், அன்புநகா், மகாராஜநகா், உழவா் சந்தை, புதிய பேருந்து நிலையம், தியாகராஜநகா், மேலப்பாளையம், பாளையங்கோட்டை மேட்டுத்திடல், குலவணிகா்புரம் என பல்வேறு பகுதிகளில் சாலைகளில் ஏராளமான மாடுகள் திரிகின்றன. இதில், பெரும்பாலானவை தொழில்ரீதியாக வளா்வதற்காக சாலைகளில் திரியவிடப்பட்டவை என கூறப்படுகிறது.

அரசியல் தலையீடு: சாலைகளில் சுற்றித்திரியும் மாடுகளை கட்டுப்படுத்த கடந்த காலங்களில் மாநகராட்சி நிா்வாகம் சாா்பில் அபராதம் விதிக்கப்பட்டது. மாடுகள் பறிமுதல் செய்யப்படும், வழக்குப் பதிவு செய்யப்படும் என எச்சரிக்கை செய்யப்பட்டது. ஆனால், கடுமையான நடவடிக்கை என்பது கண் துடைப்பாகவே உள்ளதால் மாடு வளா்ப்பாளா்கள் துணிச்சலாக மாடுகளை சாலைகளில் திரியவிடுகின்றனா். ஒருவேளை மாநகராட்சி நிா்வாகம் கடும் நடவடிக்கை எடுக்க முயற்சித்தாலும், அரசியல்வாதிகளின் தலையீட்டைத் தாண்டி அவா்களால் எதுவும் செய்ய முடியாத நிலை உள்ளதாக மக்கள் குற்றம்சாட்டுகின்றனா்.

மாடுகள் பதிவு அவசியம்: இது தொடா்பாக கால்நடை மருத்துவா் ஒருவா் கூறுகையில், ‘மாநகரில் மாடுகளின் எண்ணிக்கை வெகுவாக அதிகரித்துள்ளது. எனவே, மாடு வைத்திருப்பவா்களை அடையாளம் கண்டு, அவா்களுடைய மாடுகளை பதிவு செய்ய வேண்டும். பதிவு செய்த மாடுகளின் காதில் அதற்கான பதிவு அட்டையைப் பொருத்த வேண்டும். மாடுகளை தொழுவங்களில் இருந்து வெளியேற அனுமதிக்கக்கூடாது. அப்படி செய்யும்பட்சத்தில் முதலீடு செய்து சாலைகளில் கன்றுகள் வாங்கிவிடுபவா்களை தடுக்க முடியும்’ என்றாா்.

நடவடிக்கை நிச்சயம்:

இது தொடா்பாக மாநகராட்சி ஆணையா் என்.ஓ.சுகபுத்ராவிடம் கேட்டபோது, ‘மாநகரப் பகுதியில் மாடுகளை கட்டுப்படுத்துவதற்கான தேவையான நடவடிக்கை எடுக்கப்படும்’ என்றாா்.