`2024 T20 WC பைனலில் அவரைப் பெரிதாக யாரும் பேசுவதில்லை’ - நோ கோலி, பும்ரா; ரோஹித் கூறும் வீரர் யார்?

ரோஹித் சர்மா தலைமையிலான இந்திய அணி 2023-ல் சொந்த மண்ணில் ஒருநாள் உலகக் கோப்பை இறுதிப்போட்டியில் தோல்வியடைந்த அடுத்த ஆண்டே, டி20 உலகக் கோப்பையை வென்றது.

அந்த இறுதிப்போட்டியில் கடைசி 24 பந்துகளில் வெறும் 26 ரன்கள் எடுத்தால் தென்னாப்பிரிக்கா வெற்றி என்று கைவிட்டு போன ஆட்டத்தை இந்தியா வென்றது இன்றும் ஒரு மேஜிக் தருணமாகத்தான் இருக்கிறது.

அதைத் தனது பவுலிங்கால் சாத்தியமாக்கியது பும்ரா.

ஆனாலும், முதலில் பேட்டிங் செய்யும்போது 34 ரன்களுக்கு 3 விக்கெட்டுகளை இழந்து தவித்துக்கொண்டிருந்த நேரத்தில் தனியாளாக நின்றுகொண்டிருந்த கோலியைப் பார்க்க வைத்து அக்சர் படேல் ஆடிய அதிரடி இன்னிங்ஸ் பும்ராவின் பவுலிங்கிற்கு சற்றும் குறைவில்லாதது.

இந்த நிலையில், அந்த இறுதிப்போட்டியில் ஆட்டத்தை மாற்றியமைத்தது அக்சர் படேல்தான் என்று ரோஹித் சர்மா புகழ்ந்திருக்கிறார்.

அக்சர் படேலின் இன்னிங்ஸைப் பற்றி யாரும் அதிகம் பேசுவதில்லை!

ஜியோ சினிமாவுடனான நிகழ்ச்சியொன்றில் 2024 டி20 உலகக் கோப்பை இறுதிப்போட்டி குறித்து பேசிய ரோஹித் சர்மா, "அப்போது நான் சற்று பதட்டமானேன்.

இந்தியாவுக்காக இத்தனை ஆண்டுகள் விளையாடிய அனுபவம் உதவவும். இந்த நிலையில் உங்களின் எமோஷன்ஸ் மற்றும் எண்ணங்களைக் கட்டுப்படுத்த முடியும்.

இன்று நான் கவனமாக இருக்க வேண்டிய நாள். நிச்சயம் கோலியும் இதைத்தான் நினைத்திருப்பார்.

இதற்கு முன் என நடந்தது என்பதைப் பற்றி நான் கவலைப்படவில்லை. ஆரம்பத்தில் 3 விக்கெட்டுகள் போனதும் டிரஸ்ஸிங் ரூமில் நிறைய பதட்டங்கள் இருந்தன.

ஆனால், கோலி ஒரு அற்புதமான இன்னிங்ஸை விளையாடினார் (76 ரன்கள் அடித்திருந்தார்).

அதேசமயம், அக்சர் படேலின் இன்னிங்ஸைப் பற்றி யாரும் அதிகம் பேசுவதில்லை.

ஆனால், அதுதான் ஆட்டத்தை மாற்றிய தருணம். அந்த நேரத்தில் அவர் 31 பந்துகளில் 47 ரன்கள் அடித்தது மிக முக்கியமானது.

மறுபுறம், இன்னிங்ஸை முழுமையாகக் கொண்டுசெல்ல ஒருவர் எங்களுக்குத் தேவைப்பட்டார்.

விராட் அதை அற்புதமாகச் செய்தார். நாங்கள் வெற்றிக்கு அருகில் வந்து தோல்வியடைந்ததன் மனவேதனையை நாங்கள் அனுபவித்திருக்கிறோம்.

எனவே, நாங்கள் கவனமாகத் திட்டமிட்டு உலகக் கோப்பையை எப்படி வெல்வது என்று தொடர்ந்து யோசித்து, ஒவ்வொரு நாளும் கடினமாக உழைத்தோம். அதனால்தான் இது ஸ்பெஷலாக இருக்கிறது." என்று கூறினார்.

சினிமா விகடனின் பிரத்யேக Whatsapp க்ரூப்

https://chat.whatsapp.com/JSk78H7siYK4aL2qO1RglR

சினிமா தொடர்பான எக்ஸ்க்ளூசிவ் அப்டேட், அசத்தல் பேட்டிகள், டி.வி அப்டேட்கள் என எதையும் மிஸ் செய்யாமல் தெரிந்து கொள்ள...

உங்கள் வாட்ஸ் அப் மூலமே இணைந்திருங்கள் சினிமா விகடனுடன்...

https://chat.whatsapp.com/JSk78H7siYK4aL2qO1RglR