23 ஆண்டுகளுக்கு முன்பு ஏலத்தில் வாங்கிய தாவூத் சொத்து; சொந்தமாக்க முடியாமல் போராடும் உ.பி தொழிலதிபர்

மும்பையில் தாவூத் இப்ராகிமிற்கு சொந்தமான ஏராளமான சொத்துகள் இருந்தது. மும்பை தொடர் குண்டு வெடிப்பு சம்பவத்திற்கு பிறகு தாவூத் இப்ராகிம் குடும்பத்தோடு பாகிஸ்தானிற்கு சென்றுவிட்டார். அதனை தொடர்ந்து தாவூத் இப்ராகிம் சொத்துகளை வருமான வரித்துறை மற்றும் அமலாக்கப் பிரிவு கையகப்படுத்தியது. அவ்வாறு கையகப்படுத்திய சொத்துகள் பின்னர் ஏலத்தில் விற்பனை செய்யப்பட்டது. ஆரம்பத்தில் தாவூத் இப்ராகிமிற்கு பயந்து ஏலத்தில் விடப்பட்ட சொத்துகளை வாங்க யாரும் முன்வரவில்லை. தொடர்ந்து நடத்தப்பட்ட ஏலத்தில் தாவூத் இப்ராகிமின் அனைத்து சொத்துகளும் விற்பனை செய்யப்பட்டது. இதில் தென்மும்பை சுக்லாஜி தெருவில் தாவூத் இப்ராகிமிற்கு சொந்தமான ஒரு கடை இருந்தது. அந்த கடையை உத்தரப்பிரதேச மாநிலத்தை சேர்ந்த தொழிலதிபர் ஹேமந்த் ஜெயின் வாங்கினார்.

அவர் கடையை 2001ம் ஆண்டு வருமான வரித்துறை நடத்திய ஏலத்தில் எடுத்தார். ஏலம் எடுக்கப்பட்டு 23 ஆண்டுகள் ஆகிவிட்ட நிலையில் சம்பந்தப்பட்ட மத்திய அரசு நிர்வாகம் அக்கடையை ஹேமந்த் ஜெயின் பெயரில் பதிவு செய்து கொடுக்காமல் இழுத்தடித்து வந்தது. நீண்ட போராட்டத்திற்கு பிறகு கடந்த மாதம் 19ம் தேதிதான் அந்த சொத்து ஹேமந்த் ஜெயின் பெயரில் பதிவு செய்யப்பட்டது. இதையடுத்து சொத்தை தனது கட்டுப்பாட்டில் கொண்டு வருவதற்காக ஹேமந்த் ஜெயின் மும்பை வந்துள்ளார். அவர் நேராக கடை இருக்கும் இடத்திற்கு சென்றார். அங்கு கடை திறந்திருந்தது. அங்கு இருந்தவர்களிடம் கடையை எப்போது காலி செய்யப்போகிறீர்கள் என்று கேட்டதற்கு, சரியாக பதில் சொல்லவில்லை. அருகில் இருந்தவர்கள் கடையை எப்போது கையப்படுத்துவாய் என்று ஏளனமாக கேட்டனர்.

ஜெயின் முதலில் அங்குள்ள நாக்பாடா காவல் நிலையத்திற்கு சென்று கடையை தன்வசப்படுத்த தனக்கு உதவி செய்யும்படி கேட்டார். ஆனால் அவருக்கு உதவ போலீஸார் முன் வரவில்லை. இது குறித்து ஹேமந்த் ஜெயின் கூறுகையில், ''உங்களது பைல் துணை போலீஸ் கமிஷனரிடம் சென்று இருக்கிறது என்று சொன்னார்கள். ஒர்லியில் உள்ள துணை போலீஸ் கமிஷனர் அலுவலகத்திற்கு சென்ற போது இரவில் வரும்படி கேட்டுக்கொண்டார்கள். இரவு சென்றபோது இன்ஸ்பெக்டர் ஷிண்டேயை சந்திக்கும்படி கூறினர். அவரோ உங்களது பைல் நாக்பாடா காவல் நிலையத்திற்கு அனுப்பப்பட்டுள்ளது என்று தெரிவித்தனர்'' என்றார்.

போலீஸ் துணை இல்லாமல் அக்கடையை ஹேமந்த் ஜெயினால் கையகப்படுத்த முடியாது. ஆனால் அவருக்கு உதவ போலீஸார் தயாராக இல்லை. கடை இருக்கும் பகுதியில் சிறுபான்மை மக்கள் அதிகமாக இருக்கின்றனர். இதனால் கடையை கட்டாயப்படுத்தி கையகப்படுத்தினால் சட்டம் ஒழுங்கு பிரச்னை ஏற்பட வாய்ப்பு இருப்பதாக போலீஸார் கருதுகின்றனர் என்று கூறப்படுகிறது.