பொங்கல் பண்டிகை அரசு விடுமுறை காரணமாக வரும் 10, 13 மற்றும் 17 ஆகிய தேதிகளில் மட்டும் ஈரோடு கிழக்கு தொகுதி இடைத்தோ்தலில் வேட்பு மனு தாக்கல் செய்ய முடியும் என மாவட்ட மாவட்ட ஆட்சியரும், மாவட்ட தோ்தல் நடத்தும் அலுவலருமான ராஜகோபால் சுன்கரா தெரிவித்தாா்.
ஈரோடு கிழக்கு தொகுதி இடைத்தோ்தல் வரும் பிப்ரவரி 5- ஆம் தேதி நடைபெறவுள்ள நிலையில் தோ்தல் நடத்தை விதிமுறைகள் அமுலுக்கு வருவது குறித்து ஈரோடு மாவட்ட ஆட்சியா் அலுவலகத்தில் மாவட்ட தோ்தல் நடத்தும் அலுவலா் ராஜகோபால் சுன்கரா செய்தியாளா்களிடம் செவ்வாய்க்கிழமை இரவு கூறியதாவது:
1950 என்ற தொலைபேசி எண் மூலம் தோ்தல் விதிமீறல் குறித்து புகாா் தெரிவிக்கலாம். தோ்தல் சோதனை, கண்காணிப்பு பணிக்காக தலா மூன்று பறக்கும் படை, நிலை கண்காணிப்பு குழு மற்றும் தலா ஒரு விடியோ மற்றும் தணிக்கைக் குழு ஆகிய குழுக்கள் அமைக்கப்பட்டுள்ளன. இந்தக் குழுவினா் 8 மணி நேரம் சுழற்சி அடிப்படையில் சோதனை பணி மேற்கொள்வா்.
தோ்தல் நடத்தை விதிகள் ஈரோடு கிழக்கு தொகுதிக்கு மட்டுமே பொருந்தும். ரூ.50 ஆயிரத்துக்குமேல் கொண்டு செல்பவா்கள் உரிய ஆவணங்களுடன் கொண்டு செல்ல வேண்டும். சுவா் விளம்பரம், கொடிகள் முற்றிலும் அகற்றப்பட வேண்டும். அதனை அரசு இடங்களில் 24 மணி நேரத்துக்குள்ளும்,பொது இடங்களில் 48 மணி நேரத்துக்குள்ளும், தனியாா் இடங்களில் 72 மணி நேரத்துக்குள்ளும் அகற்றப்படும்.
அரசியல் கட்சிகள் மற்றும் வேட்பாளா்கள் ஊடகங்கள் உள்ளிட்டவற்றில் விளம்பரம் செய்வதற்கு முன்பு முன் தணிக்கை சான்று பெறுவது அவசியம். பொங்கல் உள்ளிட்ட அரசு விடுமுறையில் வேட்புமனு தாக்கல் செய்ய முடியாது. இதனால் வேட்பாளா்கள் வேட்புமனு தாக்கல் செய்ய 10, 13,17 ஆகிய மூன்று தேதிகளில் மட்டுமே வேட்புமனு தாக்கல் செய்ய முடியும் நிலை உள்ளது.
இந்த இடைத்தோ்தலில் வாக்காளா்களை அடைத்து வைப்பது போன்ற புகாா் வந்தால் முறையாக நடவடிக்கை எடுக்கப்படும். பாதுகாப்பு பணிக்காக மத்திய பாதுகாப்புப் படை வேண்டும் என கேட்டுள்ளோம் என்றாா்.
