3 ஆண்டுகளாக மருத்துவமனை நடத்தி வந்த 10 ஆம் வகுப்பு படித்த போலி மருத்துவர் கைது!

மகராஷ்டிரத்தில் 10 வகுப்பு மட்டுமே படித்து கடந்த 3 ஆண்டுகளாக மருத்துவமனை நடத்தி வந்த நபர் போலி மருத்துவர் செய்யப்பட்டார்.

மகராஷ்டிரத்தின் பந்தர்பூர் நகரில் மருத்துவமனை நடத்தி வந்த நபர் தத்தாத்ராய சதாசிவ பவார். இவர் 10 ஆம் வகுப்பு வரை படித்துள்ளார்.

மருத்துவப் பயிற்சி வகுப்பில் 4 நாள்கள் பயிற்சி எடுத்ததாகக் கூறும் இவர், அந்தப் பயிற்சியைக் கொண்டே சொந்தமாக மருத்துவமனை ஒன்றைத் தொடங்கினார். மருத்துவமனைக்கு வரும் நோயாளிகளிடம் ரூ. 500 வரை வாங்கிவந்த இவர், தினசரி 70-80 நோயாளிகள் வரை பரிசோதித்துள்ளார்.

இதையும் படிக்க | சொட்டு தண்ணீர் குடிக்காமல் 11 நாள்; கிரீஷ்மாவுக்கு தூக்கு: நீதிமன்ற தீர்ப்பில் சொல்லியிருப்பது என்ன?

நீரிழிவு நோய், எலும்புத் தேய்மானம் போன்ற தீவிர மருத்துவப் பிரச்னைகளுக்கும் இவர் ஆலோசனை வழங்கி வந்தார்.

3 ஆண்டுகளாக மருத்துவமனை நடத்தி வந்த நிலையில், திடீரென இவர் மீது அந்தப் பகுதி மக்களுக்கு சந்தேகம் வரத் தொடங்கியதால் சுகாதாரத் துறைக்கு தகவல் தெரிவித்தனர்,

காவல்துறையினர், மாநகராட்சி அதிகாரிகள், சுகாதாரத் துறை அதிகாரிகள் ஆகியோர் இவரின் மருத்துவமனையில் நடத்திய சோதனையில் மருத்துவச் சான்றிதழோ, மருத்துவமனை செயல்படுவதற்கான உரிமமோ எதுவுமின்றி இவர் மருத்துவமனையை நடத்திவந்தது கண்டறியப்பட்டது.

அதுமட்டுமின்றி, 3 ஆண்டுகளாக பந்தர்பூர் மட்டுமின்றி ஷேகான் நகரிலும் இவர் நோயாளிகளுக்கு ஆலோசனை வழங்கி வந்துள்ளார். போலி மருத்துவர் எனத் தெரியாமலே பலரும் இவரிடம் மருத்துவம் பார்த்துள்ளனர்.

இந்த மோசடி அம்பலப்படுத்தப்பட்டதைத் தொடர்ந்து, குற்றம் சாட்டப்பட்ட நபர் மீது காவல்துறையினர் நடவடிக்கை எடுத்து அவரது மருத்துவமனையை மூடியுள்ளனர். அவர் மீது வேறு வழக்குகள் ஏதேனும் உள்ளதா என்பதைக் கண்டறிய விசாரணை நடந்து வருகிறது.