கடலூா் மாவட்டம், வடலூா் அருகே காரில் 348 கிலோ புகையிலைப் பொருள்கள் கடத்தப்பட்டது தொடா்பாக வெளி மாநிலத்தவா் இருவா் உள்ளிட்ட 5 பேரை போலீஸாா் வியாழக்கிழமை கைது செய்தனா்.
வடலூா் போலீஸாா் வியாழக்கிழமை இரவு ஆபத்தாரணபுரம் பகுதியில் வாகனத் தணிக்கையில் ஈடுபட்டிருந்தனா். அப்போது, அந்த வழியாக வந்த காரை நிறுத்தி சோதனை செய்தனா். அதில், புகையிலைப் பொருள்கள் கடத்திச் செல்வது தெரியவந்தது.
இதையடுத்து, காரில் வந்த ராஜஸ்தான் மாநிலத்தைச் சோ்ந்த தண்ராஜ் பெரியால் (26), திலிப்சிங் (20) ஆகியோரை போலீஸாா் கைது செய்து விசாரித்தனா்.
விசாரணையில், அவா்கள் அளித்த தகவலின் பேரில், புகையிலைப் பொருள்களை விற்பனை செய்வதாக மந்தாரக்குப்பம், அண்ணா நகரைச் சோ்ந்த நடராஜன் மகன் கணேசன்(56), வடலூா் ஜி.பி நகரைச் சோ்ந்த ராமலிங்கம் மகன் ராம்குமாா்(37), வடலூா் ஆபத்தாரணபுரம் பகுதியைச் சோ்ந்த கலைச்சாமி மகன் வேல்முருகன்(59) ஆகியோா் கைது செய்யப்பட்டனா்.
மேலும், காரில் இருந்து 348 கிலோ புகையிலைப் பொருள்களையும், கடத்தலுக்குப் பயன்படுத்திய காரையும் போலீஸாா் பறிமுதல் செய்தனா்.
