Champions Trophy : சாம்பியன்ஸ் டிராபியில் பும்ரா ஆடுவாரா? - அணியை எப்போது அறிவிக்கும் பிசிசிஐ?

சாம்பியன்ஸ் டிராபி கிரிக்கெட் தொடர் பிப்ரவரி 19 ஆம் தேதி தொடங்கி மார்ச் 9 ஆம் தேதி வரை நடக்கவிருக்கிறது. இந்தத் தொடருக்கான உத்தேச அணியை ஜனவரி 12 ஆம் தேதிக்குள் அறிவிக்க வேண்டும் என ஐ.சி.சி கெடு விதித்திருக்கிறது. பார்டர் கவாஸ்கர் தோல்வியில் துவண்டிருக்கும் நிலையில் பிசிசிஐ என்ன மனநிலையில் இருக்கிறது? அணியைப் பற்றிய அறிவிப்பை எப்போது வெளியிடப் போகிறார்கள்?

சாம்பியன்ஸ் டிராபி தொடருக்கான போட்டி அட்டவணையை பிசிசிஐ சில நாட்களுக்கு முன்பு வெளியிட்டிருந்தது. பிசிசிஐ தரப்பில் இந்திய அணியை பாகிஸ்தானுக்கு அனுப்ப விருப்பம் தெரிவிக்காததால் இந்திய அணி ஆடும் ஆட்டங்களை மட்டும் துபாயில் நடத்த ஐ.சி.சி திட்டமிட்டிருக்கிறது. இந்திய அணி பிப்ரவரி 20 ஆம் தேதி வங்கதேசத்தையும் பிப்ரவரி 23 ஆம் தேதி பாகிஸ்தானையும் மார்ச் 2 ஆம் தேதி நியூசிலாந்து அணியையும் இந்திய அணி எதிர்கொள்கிறது.

இந்தத் தொடருக்கான உத்தேச அணியை ஜனவரி 12 ஆம் தேதிக்குள் அத்தனை அணிகளும் அறிவிக்க வேண்டும் என ஐ.சி.சி கூறியிருந்தது. அறிவிக்கப்படும் அணியில் பிப்ரவரி 13 ஆம் தேதி வரை மாற்றங்களையும் செய்து கொள்ள முடியும். அணிகள் விருப்பப்பட்டால் ஜனவரி 12 ஆம் தேதியே தங்களின் அணியை பொதுவில் அறிவிக்கலாம். இல்லையெனில், பிப்ரவரி 13 ஆம் தேதி ஐ.சி.சி யே அத்தனை நாடுகளின் அணியையும் முழுமையாக அறிவிக்கும்.

பார்டர் கவாஸ்கர் தொடர் இப்போதுதான் முடிந்திருக்கிறது. இந்திய அணி அடுத்ததாக இங்கிலாந்துக்கு எதிராக 5 டி20 க்கள் மற்றும் 3 ஓடிஐ க்களை கொண்ட உள்ளூர் தொடரில் ஆடவிருக்கிறது. இந்தத் தொடரில் ரோஹித் சர்மா, விராட் கோலி, பும்ரா போன்ற அனுபவ வீரர்களுக்கு ஓய்வளிக்கப்படலாம் என்றும் தகவல்கள் வெளியாகியிருக்கிறது. சிட்னியில் நடந்த கடைசிப் போட்டியின் இரண்டாவது இன்னிங்ஸின் போது பும்ரா காயம் காரணமாக களத்திலிருந்து வெளியேறினார். பும்ரா சாம்பியன்ஸ் டிராபியில் பங்கெடுப்பதும் சந்தேகத்துக்குரியதுதான் என்றும் கூட தகவல்கள் வெளியாகி வருகிறது.

இந்நிலையில்தான் சாம்பியன்ஸ் டிராபிக்கான அணியை தேர்ந்தெடுப்பதற்கான கூட்டத்தை பிசிசிஐ ஜனவரி 10 ஆம் தேதி நடத்தவிருக்கிறது. அந்த கூட்டத்தின் முடிவில்தான் இந்திய அணியை தேர்வு செய்து அறிவிப்பார்கள் என்றும் தெரிகிறது.