Mandaadi: "ஜல்லிக்கட்டு எப்படியோ, அப்படித்தான் பாய்மரப் படகு போட்டியும்" - இயக்குநர் வெற்றிமாறன்

வெற்றிமாறனின் 'விடுதலை' படத்தில் கதை நாயகனாக சூரிக்குக் கிடைத்த வரவேற்பை அடுத்து `கொட்டுக்காளி', `கருடன்' எனத் தொடர்ந்து ஹீரோவாக ஹிட் கொடுத்தார் நடிகர் சூரி.

இதையடுத்து பிரசாந்த் பாண்டியராஜ் இயக்கத்தில் சூரி நடித்த 'மாமன்' திரைப்படம் வரும் மே 9ம் தேதி திரையரங்குகளில் வெளியாகக் காத்திருக்கிறது.

இந்நிலையில் மதிமாறன் புகழேந்தி இயக்கத்தில் `மண்டாடி’ எனும் படத்தில் நடிக்கவிருக்கிறார். இதன் டைட்டில் வெளியிடப்பட்டு படத்திற்கான ஃபர்ஸ்ட் லுக் போஸ்டர் வெளியீட்டு விழா நேற்று சென்னையில் நடைபெற்றது.

வெற்றிமாறனின் `விடுதலை' படத்தைத் தயாரித்த எல்ரட் குமாரின் ஆர்.எஸ். இன்ஃபோடைமண்ட் இப்படத்தைத் தயாரிக்கிறது.

இப்படத்தில் கிரியேட்டிவ் தயாரிப்பாளராக வெற்றிமாறன் பங்களிக்கிறார். ஜி.வி. பிரகாஷ் இசையமைக்கிறார்.

இந்த ஃபர்ஸ்ட் லுக் போஸ்டர் வெளியிட்டு விழா செய்தியாளர் சந்திப்பில் பேசியிருக்கும் வெற்றிமாறன், "இப்படத்தில் பாய்மரப் படகு போட்டி (பாய்மரப் படகோட்டம்) கதைக்களமாகச் சுவாரஸ்யமான விஷயமாக இருந்தது.

நிலம் சார்ந்து வாழ்பவர்களுக்கு ஜல்லிக்கட்டு எப்படியோ, அப்படித்தான் கடல் சார்ந்து வாழ்பவர்களுக்குப் பாய்மரப் படகு போட்டி. அது இப்படத்திற்கு ரொம்ப சுவாரஸ்யமான கதைக்களமாக இருக்கும்.

எந்த மாதிரியான படத்திற்கும் இசையமைப்பவர் ஜி.வி பிரகாஷ்

ஹீரோ மாஸ், கதையை மையமாகக் கொண்ட கதை என எந்த மாதிரியான படத்திற்கும் சிறப்பாக இசையமைப்பவர் ஜி.வி பிரகாஷ். அவரின் இசை இப்படத்துக்குப் பெரிய பலமாக இருக்கும்.

மதிமாறன் புகழேந்தி சுயமரியாதை மிக்க நல்ல இயக்குநர். அவர் இந்தக் கதையைச் சொல்லும்போதே புதிய கதைக்களமாகச் சுவாரஸ்யமாக இருந்தது.

கடினமாக உழைப்பவர் சிறப்பாகப் படத்தை இயக்கிவிடுவார். தயாரிப்பாளர் எல்ரெட் குமார் செலவுகளைப் பற்றி கவலைப்படாமல் படம் நன்றாக வரவேண்டும் என்று சினிமா கனவுடன் இருப்பவர். அவர் இந்தப் படத்தைத் தயாரிப்பதும் பெரும் பலமாக இருக்கும்.

சூரி எவ்வளவு அடிச்சாலும்

எந்த மாதிரியான கதாபாத்திரத்தையும் தன்னுடைய உழைப்பால் செய்யக் கூடியவர் சூரி. எந்த மாதியான கதைக்கும், கதாபாத்திரத்திற்கும் பொருந்திப்போய்விடுவதுதான் அவரது பலம்.

எவ்வளவு அடிச்சாலும் தாங்கும் உடல் வலிமையும் அவருக்கு இருக்கிறது. உடல் - மனம் இரண்டிலும் வலிமையானவர். கஷ்டமான காட்சிகளில் கடினமான உழைப்பைப் போட்டு சோர்வின்றி நடிப்பவர்.

அவரை வைத்து எந்த மாதிரியான கஷ்டமான காட்சியையும் எடுத்துவிடலாம். அவரை வைத்து சலிப்பின்றி அடுத்தடுத்த காட்சிகளை எடுக்கலாம். அந்த அளவிற்குக் கடினமான உழைப்பாளி சூரி.

இப்படத்தின் கிரியேட்டிவ் தயாரிப்பாளராக நான் உரிமையுடன் படத்தைப் பார்த்து அழுத்தமாக அறிவுரைகளை வழங்கி படம் சிறப்பாக உருவாக என்னால் முடிந்த பங்களிப்பைச் செய்வேன்" என்று பேசியிருக்கிறார் வெற்றிமாறன்

சினிமா விகடனின் பிரத்யேக Whatsapp க்ரூப்

https://chat.whatsapp.com/KzgH8aPb2MI9PVttY53JpX

சினிமா தொடர்பான எக்ஸ்க்ளூசிவ் அப்டேட், அசத்தல் பேட்டிகள், டி.வி அப்டேட்கள் என எதையும் மிஸ் செய்யாமல் தெரிந்து கொள்ள...

உங்கள் வாட்ஸ் அப் மூலமே இணைந்திருங்கள் சினிமா விகடனுடன்...

https://chat.whatsapp.com/KzgH8aPb2MI9PVttY53JpX