Rain Alert: 'இன்று இரவு முதல் கனமழை' - எந்தெந்த மாவட்டங்களுக்கு எச்சரிக்கை? வானிலை மையம் சொல்வதென்ன?

ஃபெஞ்சல் புயல் கரையைக் கடந்த பிறகு ஏற்பட்ட காற்றழுத்தத் தாழ்வு மண்டலத்தால் தமிழ்நாடு முழுவதும் ஆங்காங்கே கனமழை கொட்டித் தீர்த்து வருகிறது.

புதுவை, விழுப்புரம், செங்கல்பட்டு, கடலூர், திருவண்ணாமலை, உள்ளிட்ட பகுதிகளில் கொட்டித் தீர்த்த கனமழையால் வெள்ளம் ஏற்பட்டு அதிகமான பாதிப்புகள் ஏற்பட்டிருக்கின்றன. கிருஷ்ணகிரி, திருப்பத்தூர், தர்மபுரி, சேலம், நீலகிரி, கோவை, ஈரோடு, திருப்பூர், திண்டுக்கல், தேனி பகுதிகளிலும் ஓரிரு இடங்களில் கன மழை தொடர்ந்து பெய்துகொண்டிருக்கிறது.

இதற்கிடையில் மேற்குத் தொடர்ச்சி மலையை ஒட்டி அமைந்திருக்கும் நீலகிரி, கோவை, ஈரோடு, திருப்பூர், திண்டுக்கல் உள்ளிட்ட மாவட்டங்களிலும் கனமழை பெய்யும் என்று எச்சரிக்கை விடுக்கப்பட்டுள்ளது. சுற்றுலாப் பயணிகள் மேற்குத் தொடர்ச்சி மலைப் பகுதிக்குச் செல்ல வேண்டாம் என்று அறிவுறுத்தப்பட்டிருக்கிறார்கள்.

இந்நிலையில் இன்றும், நாளையும் (டிச. 2, 3) தமிழகத்தின் பல்வேறு மாவட்டங்களில் கனமழை இருக்கும் என்று இந்திய வானிலை ஆய்வு மையம் எச்சரிக்கை விடுத்திருக்கிறது. அதில் குறிப்பாக, மேற்குத் தொடர்ச்சி மலையை ஒட்டியுள்ள பகுதிகளிலும், கோவையிலும் அதி கனமழை பெய்ய வாய்ப்பிருப்பதாக ரெட் அலார்ட் கொடுக்கப்பட்டிருக்கிறது. மேலும், இன்று இரவு முதலே மழை ஆரம்பிக்கும் எனத் தெரிவிக்கப்பட்டிருக்கிறது.

2.12.2024 - இன்று

ரெட் அலார்ட் (அதி கனமழை ): நிலக்கரி மற்றும் மேற்குத் தொடர்ச்சி மலையை ஒட்டியுள்ள கோவை மாவட்டங்கள்.

ஆரஞ்சு அலார்ட் (மிகக் கனமழை): கோவை, ஈரோடு, திருப்பூர், தேனி, திண்டுக்கல்.

மஞ்சள் அலார்ட் (கனமழை): கிருஷ்ணகிரி, தர்மபுரி, சேலம், நாமக்கல், கரூர், திருச்சி, பெரம்பலூர், மதுரை, விருதுநகர், தென்காசி.

3.12.2024 (நாளை - செவ்வாய்)

மஞ்சள் அலார்ட் (கனமழை): கிருஷ்ணகிரி, தர்மபுரி, சேலம், நாமக்கல், கரூர், ஈரோடு, நீலகிரி, கோவை, திருப்பூர், திண்டுக்கல், தேனி, மதுரை, திருச்சி, பெரம்பலூர், திருப்பத்தூர்.

இந்த கனமழையில் அதிகபட்சமாக வெள்ளம் வருவது, மரங்கள் விழுவது, மண் சரிவு முதல் தாழ்வான பகுதிகளில் நீர் சூழ்வது வரையிலான பாதிப்புகள் ஏற்பட வாய்ப்பிருப்பதாக இந்திய வானிலை ஆய்வு மையம் தெரிவித்திருக்கிறது.

மழை எச்சரிக்கை விடுக்கப்பட்ட மாவட்டங்களில் இருக்கும் மக்கள் முன்னெச்சரிக்கையுடனும், பாதுகாப்புடன் இருக்க வேண்டும் என்று அறிவுறுத்தியுள்ளது.

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/TATAStoryepi01