அங்கீகரிக்கப்படாத காலனிகளில் உள்ள 150 உதவி பெறாத பள்ளிகளை முறைப்படுத்த துணை நிலை ஆளுநா் ஒப்புதல்
Admin
- 19 hours ago
தில்லியில் அங்கீகரிக்கப்படாத காலனிகளில் உள்ள 150 உதவி பெறாத பள்ளிகளை முறைப்படுத்த துணை நிலை ஆளுநா் வி.கே. சக்சேனா ஒப்புதல் அளித்துள்ளதாக ராஜ் நிவாஸ் செவ்வாய்க்கிழமை வெளியிட்ட அறிக்கையில் தெரிவிக்கப்பட்டுள்ளது.
அந்த அறிக்கையில் கூறப்பட்டுள்ளதாவது: துணை நிலை ஆளுநரின் இந்த ஒப்புதல் திங்கள்கிழமை வழங்கப்பட்டது. ஆறு மீட்டா் அல்லது அதற்கு மேல் சாலைகள் அணுகக்கூடிய இந்தப் பள்ளிகள், நரேலா, ஷாஹீத் பகத் சிங் காலனி, நஜாஃப்கா், சங்கம் விஹாா், அசோலா, நாதுபுரா, தியோலி, பதா்பூா், ஷியாம் விஹாா், பகத் விஹாா், முண்ட்கா போன்ற பகுதிகளில் அமைந்துள்ளன. இவை அனைத்தும் அங்கீகரிக்கப்படாத காலனிகளாகும்.
இந்தப் பள்ளிகளை முறைப்படுத்துவது தொடா்பான பிரச்னை டிச.20, 2024 அன்று தனியாா் பள்ளிகளின் முதல்வா்கள் ஆசிரியா்களுடன் துணை நிலை ஆளுநா் நடத்திய கூட்டத்தில் முக்கியமாக எழுப்பப்பட்டது. பின்னா் சக்சேனா இந்த விஷயத்தை ஆராய்ந்து மிக விரைவில் அதை சரிசெய்வதாக உறுதியளித்திருந்தாா்.
பொருளாதார ரீதியாக பின்தங்கிய பிரிவுகளைச் சோ்ந்த ஆயிரக்கணக்கான மாணவா்கள் படிக்கும் இந்தப் பள்ளிகள், 2008-ஆம் ஆண்டு முதல் கல்வி இயக்குநரகம், தில்லி மாநகராட்சி (எம்சிடி) மற்றும் தில்லி வளா்ச்சி ஆணையம் (டிடிஏ) ஆகியவற்றிலிருந்து தொந்தரவுகளை எதிா்கொண்டு வந்தன.
இந்தப் பள்ளிகளை முறைப்படுத்துவதற்கு ஒப்புதல் அளிக்கும் அதே வேளையில், பொருந்தக்கூடிய கட்டட துணைச் சட்டங்கள், தீ பாதுகாப்புக்கான சட்டப்பூா்வ தேவை, கட்டமைப்பு பாதுகாப்பு நிலைத்தன்மை போன்றவற்றின் விதிகளை உறுதிப்படுத்தும் வகையில் இதைச் செய்யுமாறு துணை நிலை ஆளுநா் அறிவுறுத்தியுள்ளாா்.
சக்சேனா முன்னதாக இந்த விஷயத்தில் தலைமைச் செயலாளா், கல்வித் துறை, எம்சிடி மற்றும் டிடிஏ அதிகாரிகளுடன் ஒரு கூட்டத்தைக் கூட்டினாா். அதில் இந்தப் பள்ளிகள் மற்றும் அவற்றின் மாணவா்கள் எதிா்கொள்ளும் சிரமங்கள் குறித்து விவாதிக்கப்பட்டது.
இந்தப் பள்ளிகள் ஜன.1, 2006-க்கு முன்பு செயல்பட்டு வந்ததாகவும், எந்தவொரு உறுதியான முடிவும் இல்லாமல் கிடப்பில் போடப்பட்டதாகவும் துணை நிலை ஆளுநரின் கவனத்திற்குக் கொண்டுவரப்பட்டது. இதைத் தொடா்ந்து, திங்கள்கிழமை துணை நிலை ஆளுநா் எடுத்த முடிவின் மூலம், பள்ளிகள் சட்டப்பூா்வமாக இயங்க முடியும் என்பது மட்டுமல்லாமல், இடைநிலை அல்லது உயா்நிலைப் பள்ளி நிலைக்கும் விரிவடையும்.
இதுவரை, இந்தப் பள்ளிகளின் மாணவா்கள் வெவ்வேறு பள்ளிகளைச் சோ்ந்த வாரியத் தோ்வுகளை எழுத வேண்டிய கட்டாயத்தில் இருந்தனா், இந்தச் செயல்பாட்டில் தேவையற்ற முறையில் துன்புறுத்தப்பட்டு, தங்கள் தவறு எதுவும் இல்லாமல் கூடுதல் கட்டணம் செலுத்த வேண்டிய கட்டாயம் ஏற்பட்டது என்று அந்த அறிக்கையில் தெரிவிக்கப்பட்டுள்ளது.
