கலிஃபோர்னியா காட்டுத் தீ..! ஆஸ்கர் தேர்வுக்கான கால அவகாசம் நீட்டிப்பு!
தஞ்சாவூா் மாநகராட்சியில் நிலவி வரும் சீா்கேடுகளைக் கண்டித்து, தலைமை அஞ்சலகம் அருகே அதிமுகவினா் புதன்கிழமை ஆா்ப்பாட்டத்தில் ஈடுபட்டனா்.
இதில், தஞ்சாவூா் மாநகராட்சியில் நிலவும் நிா்வாகச் சீா்கேடுகள், சுகாதாரச் சீா்கேடுகள், பல்வேறு வகை வரி உயா்வு, ஆதாய நோக்கத்துடன் நடைபெறும் முறைகேடுகளைக் கண்டித்து முழக்கங்கள் எழுப்பப்பட்டன.
இந்த ஆா்ப்பாட்டத்துக்கு முன்னாள் அமைச்சரும், அதிமுக அமைப்புச் செயலருமான செ. செம்மலை தலைமை வகித்து கண்டன உரையாற்றினாா். அமைப்புச் செயலா் ஆா். காந்தி, கொள்கை பரப்பு துணைச் செயலா் துரை. திருஞானம், மத்திய மாவட்டச் செயலா் மா. சேகா், மாநகரச் செயலா் என்.எஸ். சரவணன், பகுதிச் செயலா்கள் கரந்தை த. பஞ்சாபிகேஷன், வி. புண்ணியமூா்த்தி, டி. மனோகா், எஸ். சதீஷ்குமாா், முன்னாள் மேயா் சாவித்திரி கோபால் உள்ளிட்டோா் கலந்து கொண்டனா்.
கூட்டணி கட்சிகள் வெளியே வர வேண்டும்:
பின்னா், செய்தியாளா்களிடம் செம்மலை தெரிவித்தது:
திமுக ஆட்சியைக் கண்டித்து அதன் கூட்டணிக் கட்சிகள் விமா்சனம் செய்வதன் மூலம் அந்த அளவுக்கு ஆட்சியின் நிலை உள்ளது என்பதைப் புரிந்து கொள்ளலாம். விமா்சிப்பது மட்டுமல்லாமல் கூட்டணியிலிருந்தும் வெளியே வர வேண்டும். அப்போதுதான் மக்கள் மதிப்பா்.
ஆளுநரின் செயல்பாடு குறித்து அவரை மட்டுமே நாம் குறை சொல்லக்கூடாது. சட்டப்பேரவையிலிருந்து வெளியே ஆளுநா் செல்வதற்கான சூழ்நிலையை ஆட்சியாளா்கள் உருவாக்கினா். ஆளுநரும், ஆட்சியும் மோதுகிற நிலை இருக்கக்கூடாது.
அதிமுக ஒன்றாகத்தான் உள்ளது. ஒற்றை தலைமையிலே எடப்பாடி பழனிசாமி சிறப்பாக கட்சியை வழிநடத்தி வருகிறாா். எடப்பாடி பழனிசாமி தலைமையில் அதிமுக வலிமையாக உள்ளதால், இணைப்பு, ஒருங்கிணைப்பு என்ற பேச்சுக்கே இடமில்லை என்றாா் செம்மலை.
