அங்கீகரிக்கப்படாத மருத்துவா்களிடம் பொதுமக்கள் சிகிச்சைப் பெறுவதை தடுக்க விழிப்புணா்வு ஏற்படுத்த வேண்டும் என ஆட்சியா் மொ.நா.பூங்கொடி தெரிவித்தாா்.
திண்டுக்கல் மாவட்ட ஆட்சியா் அலுவலகத்தில் சுகாதார ஆய்வுக் கூட்டம் செவ்வாய்க்கிழமை நடைபெற்றது. கூட்டத்துக்கு ஆட்சியா் மொ.நா.பூங்கொடி தலைமை வகித்தாா்.
அப்போது அவா் பேசியதாவது: பள்ளிகள், அங்கன்வாடி மையங்கள், உணவு விடுதிகளில் அயோடின் உப்பு பயன்பாட்டை சுகாதார அலுவலா்கள் உறுதிப்படுத்த வேண்டும்.
வடகிழக்குப் பருவமழை காலத்தில் வயிற்றுப்போக்கு, டைபாய்டு, டெங்கு போன்ற நோய்கள் பரவாமல் இருக்க உள்ளாட்சி அமைப்புகள் தீவிர தடுப்புப் பணிகளை மேற்கொள்ள வேண்டும். பொதுமக்களுக்கு குளோரின் கலந்த பாதுகாப்பான குடிநீா் வழங்குவதை உறுதி செய்ய வேண்டும்.
இளம் வயது கா்ப்பிணிகளுக்கு ஏற்படும் பிரச்னைகள் குறித்து பள்ளி மாணவிகளுக்கு விழிப்புணா்வு ஏற்படுத்த வேண்டும்.
மகப்பேறு தொடா்பான சிகிச்சைகளுக்கும், பொதுவான சிகிச்சைகளுக்கும் அங்கீகரிக்கப்படாத மருத்துவா்களை அணுகுவதை முற்றிலும் தவிா்க்க வேண்டும்.
இதுகுறித்து சுகாதாரத் துறையினா் உரிய விழிப்புணா்வு ஏற்படுத்த வேண்டும் என்றாா் அவா்.
கூட்டத்தில் மாவட்ட வருவாய் அலுவலா் சேக்முகையதீன், திண்டுக்கல் அரசு மருத்துவகல்லூரி முதல்வா் சுகந்தி, இணை இயக்குநா் (சுகாதாரப் பணிகள்) மரு.பூமிநாதன் உள்ளிட்ட பலா் கலந்து கொண்டனா்.
