`அண்ணா பல்கலை. மாணவி வழக்கில் தமிழக டிஜிபி-க்கு 3 உத்தரவுகள்' - தாமாக முன்வந்த தேசிய மகளிர் ஆணையம்

சென்னை அண்ணா பல்கலைக்கழகத்தில் மாணவியொருவர் பாலியல் துன்புறுத்தலுக்குள்ளான சம்பவம் பரபரப்பை ஏற்படுத்தியிருக்கிறது. இதில், பாதிக்கப்பட்ட மாணவியால் குற்றம்சாட்டப்பட்ட ஞானசேகரன் என்பவரை போலீஸார் கைது செய்து விசாரித்து வருகின்றனர். இதற்கிடையில், மாணவியின் பெயர், முகவரி உள்ளிட்ட தகவல்கள் அடங்கிய எஃப்.ஐ.ஆர் இணையத்தில் கசிந்தது. உடனடியாக இதை முடக்கிய காவல்துறை, சமூக வலைதளங்களில் இதைப் பகிர்ந்தால் கடுமையான நடவடிக்கை எடுக்கப்படும் என எச்சரித்தது.

இவ்வாறிருக்க, பெண்ணுக்கு நேர்ந்த பாலியல் துன்புறுத்தல் மற்றும் எஃப்.ஐ.ஆர் கசிந்த விவகாரத்தில் கண்டங்களைத் தெரிவித்துவரும் அரசியல் கட்சிகள், குற்றவாளிக்கு கடும் தண்டனை அளிக்க வலியுறுத்திவருகிறது. தி.மு.க அரசின் மீதும் எதிர்க்கட்சிகள் கடுமையான விமர்சனங்களை முன்வைக்கின்றன. இந்த நிலையில், பாதிக்கப்பட்ட பெண்ணுக்கு பாதுகாப்பை உறுதி செய்யவும், எஃப்.ஐ.ஆர் கசிவில் சம்பந்தப்பட்ட அதிகாரிகள் மீது நடவடிக்கை எடுக்கவும் தமிழக தமிழக டி.ஜி.பி-க்கு தேசிய மகளிர் ஆணையம் உத்தரவிட்டிருக்கிறது.

இது குறித்து, எக்ஸ் தளத்தில் தேசிய மகளிர் ஆணையம், ``சென்னை அண்ணா பல்கலைக்கழகத்தைச் சேர்ந்த 19 வயது மனைவி பாலியல் துன்புறுத்தலுக்குள்ளானதைத் தேசிய மகளிர் ஆணையம் தாமாக முன்வந்து விசாரிக்கிறது. இந்தக் கொடூரமான செயலைக் கண்டிக்கிறது. மேலும், நீதிக்கான போராட்டத்தில் பாதிக்கப்பட்ட பெண்ணின் பக்கம் நிற்கிறது. குற்றம்சாட்டப்பட்டவர் தொடர்ச்சியாக இதுபோன்ற செயல்களில் ஈடுபடும் நபர் என்று தேசிய மகளிர் ஆணையம் குறிப்பிடுகிறது. இவர் மீதான முந்தைய வழக்குகளில் தமிழ்நாடு காவல்துறை நடவடிக்கை எடுக்கத் தவறிவிட்டது. இந்த அலட்சியமே அவரை மீண்டும் இதுபோன்ற குற்றங்களைச் செய்யத் தூண்டியிருக்கிறது.

தமிழ்நாட்டில் சட்டம் ஒழுங்கு சீர்குலைந்திருப்பது கவலையளிக்கிறது. பாதிக்கப்பட்டவருக்கு இலவச மருத்துவம் மற்றும் பாதுகாப்பை உறுதி செய்யவும், இதில் கடுமையான தண்டனைக்கு BNS 2023-ன் பிரிவு 71-ஐ எஃப்.ஐ.ஆரில் சேர்க்கவும், பாதிக்கப்பட்டவரின் அடையாளத்தைப் பகிரங்கமாக வெளிப்படுத்தியதற்காகவும், BNS 2023-ன் பிரிவு 72-ஐ மீறியதற்காக சம்பந்தப்பட்ட அதிகாரிகள் மீது நடவடிக்கை எடுக்கவும், தமிழக டி.ஜி.பி-க்கு தேசிய மகளிர் ஆணையத்தின் தலைவர் விஜய ரஹத்கர் உத்தரவிட்டிருக்கிறார்." என்று பதிவிட்டிருக்கிறது.

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/MaperumSabaithanil