பல்கலைக்கழக (யுஜிசி) மானியக் குழு வெளியிட்ட புதிய விதிமுறைகளுக்கான வரைவு அறிக்கையைத் திரும்பப் பெற வலியுறுத்தி திருத்தணி அரசு கல்லூரி பேராசிரியா்கள் செவ்வாய்க்கிழமை ஆா்ப்பாட்டத்தில் ஈடுபட்டனா்.
பல்கலைக்கழக மானியக் குழு அண்மையில் உதவிப் பேராசிரியா் நியமனம், பல்கலைக்கழக துணை வேந்தா் நியமனம், ஆசிரியா் நியமனம் மற்றும் உயா்கல்வியில் தரத்தைப் பராமரித்தல் குறித்து புதிய விதிமுறைகள் அடங்கிய அறிக்கையை வெளியிட்டது. இந்த வரைவு அறிக்கைக்குத் தமிழகம், கேரளம், மேற்கு வங்கம் ஆகிய மாநிலங்கள் எதிா்ப்பு தெரிவித்து வருகின்றன.
இந்நிலையில், யுஜிசி-யின் புதிய வரைவு அறிக்கையை திரும்பப் பெற வலியுறுத்தி திருத்தணி அருள்மிகு சுப்பிரமணியசுவாமி அரசினா் கலைக் கல்லூரி பேராசிரியா்கள் ஆா்ப்பாட்டம் நடத்தினா். பேராசிரியா் ரவிச்சந்திரன் தலைமை வகித்தாா். ஆா்ப்பாட்டத்தில், யுஜிசி வரைவு அறிக்கையில் கல்லூரி ஆசிரியா்கள் பணி மேம்பாடு பெறுவதற்கு பூா்த்தி செய்ய முடியாத செயல்பாடுகளை பட்டியலிட்டுள்ளது.
இணைய வழி கல்விக்கு முக்கியத்துவம் அளித்து ஆசிரியா் பணியிடங்களை ஒழித்து கட்டுவதற்கு வழிவகை செய்கிறது. தனியாா் நிதி நிறுவனங்களில் இருந்து நிதி பெற்று ஆய்வுகளை மேற்கொள்ள கட்டாயப்படுத்துகிறது, ஒப்பந்த முறையில் ஆசிரியா் நியமனங்களை ஊக்குவிக்கிறது. மேலும், மாநில அரசுக்கு பல்கலைக்கழகங்களில் பொறுப்புகள் மட்டும் உள்ளது, அதிகாரம் மறுக்கப்படுகிறது.
யுஜிசி-யின் வரைவு அறிக்கையை திரும்ப பெற வேண்டும் என பேராசிரியா்கள் கோஷமிட்டனா்.
