ஆவடி ஓசிஎஃப் ராணுவ சீருடைகள் தென் அமெரிக்காவுக்கு ஏற்றுமதி

இந்தியாவில் முதல் முறையாக தென் அமெரிக்காவில் உள்ள "சுரினாம்' நாட்டின் ராணுவத்துக்கு, ஆவடியில் உள்ள படைத்துறை உடைதொழிற்சாலையில் ஆடைகள் தயாரித்து ஏற்றுமதி செய்யப்பட்டது.

ஆவடியில் உள்ள முப்படையினருக்கான சீருடைகள் தயாரிக்கும், படைத் துறை உடைதொழிற்சாலை (ஓசிஎஃப்) இயங்கி வருகிறது. இந்த தொழிற்சாலை சார்பில் இந்தியாவில் முதன் முறையாக தென் அமெரிக்காவில் உள்ள "சுரினாம்' நாட்டின் ராணுவத்துக்கு சீருடை தயாரித்து அனுப்பப்பட்டுள்ளது. இதற்கான நிகழ்ச்சி ஓசிஎப் வளாகத்தில் செவ்வாய்க்கிழமை நடைபெற்றது. அப்போது, ஓசிஎப் பொது மேலாளர் பி.எஸ்.ரெட்டி கொடியசைத்து ஏற்றுமதி வாகனத்தை தொடங்கி வைத்தார்.

பின்னர், ஓசிஎஃப் பொதுமேலாளர் பி.எஸ்.ரெட்டி செய்தியாளர்களிடம் கூறியது: படைத் துறை உடை தொழிற்சாலை 1961-ஆம் ஆண்டு தொடங்கப்பட்டது. ஆரம்ப காலத்தில் ராணுவ உடைகள் மட்டுமே தயாரிக்கப்பட்டது. தற்போது முப்படைகளுக்கு தேவையான அதிக சக்தி வாய்ந்த புல்லட் புரூஃப் ஜாக்கெட்டுகள், பாதுகாப்புத் துறைக்கு தேவையான சீருடைகள் தயாரித்து வருகிறோம்.

இந்த நிலையில், உள்நாட்டு உற்பத்தி மட்டுமின்றி மற்ற நாடுகளின் ராணுவத்துக்கான சீருடைகளை தயாரிக்கும் பணி தொடங்கியுள்ளது. அதன்படி, முதல்கட்டமாக தென் அமெரிக்காவில் உள்ள சுரினாம் நாட்டுக்கு 4,500 ராணுவ உடைகள் அனுப்பப்பட்டன. இதன் மதிப்பு ரூ. 1.71 கோடி. இந்த சீருடைகள் அடுத்த 2 மாதங்களுக்குள் அந்த நாட்டுக்கு சென்றடையும். வரும் காலத்தில் பல நாடுகளுக்கு ராணுவ உடைகளை தயாரித்து வழங்க திட்டமிட்டுள்ளோம்.

இதேபோல, கடந்த ஆண்டு பாதுகாப்பு தளவாடங்களின் ஏற்றுமதி மூலம் ரூ. 20,083 கோடி வருவாய் கிடைத்துள்ளது. 31 சதவீதம் ஏற்றுமதி அதிகரித்துள்ளது. கடந்த 10 ஆண்டுகளில் பாதுகாப்புத் துறைக்கான ஏற்றுமதி குறிப்பிட்ட வளர்ச்சியை அடைந்துள்ளது. 2029-ஆம் ஆண்டுக்குள் ஏற்றுமதி மூலம் ரூ. 50,000 கோடி வரை வருவாய் ஈட்ட மத்திய அரசு இலக்கு நிர்ணயம் செய்துள்ளது.

இந்த தொழிற்சாலையில் இருந்து தற்போது உடை மற்றுமே தயாரித்து ஏற்றுமதி செய்யப்பட்டுள்ளது. இங்கிருந்து 90 சதவீத உடைகள் ராணுவத்துக்கு வழங்கப்படுகின்றன. ஒவ்வொரு நாட்டுக்கும் தட்ப வெப்பநிலை மாறுபடும்.

எனவே, அந்த நாட்டின் காலநிலைக்கு ஏற்றவாறு இந்த உடை தயாரிக்கப்பட்டுள்ளது. முப்படைகளுக்கும் சேர்த்து ஆண்டுக்கு 8 லட்சம் முதல் 9 லட்சம் உடைகள் இங்கு தயாரிக்கப்படுகிறது என்றார்.

நிகழ்ச்சியில், கூடுதல் துணை பொதுமேலாளர்கள் குகன், ராஜ் கிஷோர், செந்தில்குமார், அகில இந்திய பாதுகாப்புத் துறை தொழிலாளர்கள் சம்மேளனத்தின் பொதுச்செயலர் சி.ஸ்ரீகுமார் உள்ளிட்ட தொழிற்சங்க நிர்வாகிகள், ஊழியர்கள் கலந்து கொண்டனர்.