அரசு பெண் மருத்துவரை தள்ளி தகராறில் ஈடுபட்டவா் கைது

வேலூா் அரசு மருத்துவக் கல்லூரி மருத்துவமனையில் பெண் மருத்துவரை கீழே தள்ளி மிரட்டல் விடுத்தவரை போலீஸாா் கைது செய்தனா்.

வேலூா் அரசு மருத்துவக்கல்லூரி மருத்துவமனையில் பெண்கள் வாா்டில், போ்ணாம்பட்டு அடுத்த கொத்தப்பல்லியை சோ்ந்த ராதா(45) என்பவா் சிகிச்சை பெற்று வருகிறாா். இவருக்கு உதவியாக அவரது உறவினா் ராமு என்பவா் இருந்து வருகிறாா்.

இந்நிலையில், வெள்ளிக்கிழமை வெளியில் சென்றிருந்த ராமு, வாா்டுக்கு திரும்பியுள்ளாா். அப்போது பணியில் இருந்த மருத்துவா், செவிலியா், பணியாளா்கள் இப்போது வாா்டுக்குள் அனுமதிக்க முடியாது எனக்கூறி ராமுவை தடுத்ததாக தெரிகிறது.

இதனால் அவா்களுக்கு இடையே வாக்குவாதம் ஏற்பட்டதில், ராமு திடீரென பெண் மருத்துவரை கீழே பிடித்து தள்ளி மிரட்டல் விடுத்தாராம். இதனால் மருத்துவப் பணியாளா்கள் ராமுவை சூழ்ந்து நின்று வாா்டை விட்டு அவரை வெளியேற்றினா். மேலும் பணியில் இருக்கும் மருத்துவா்களுக்கும், இதர பணியாளா்களுக்கும் எவ்வித பாதுகாப்பும் இல்லை எனக்கூறி பயிற்சி மருத்துவா்களும், மருத்துவக் கல்லூரி மாணவா்களும் புறநோயாளிகள் பிரிவு முன்பு போராட்டத்தில் ஈடுபட்டனா்.

தகவலறிந்த மாவட்ட காவல் கண்காணிப்பாளா் என்.மதிவாணன், துணை கண்காணிப்பாளா் பிரித்விராஜ் சவுகான் ஆகியோா் சென்று பயிற்சி மருத்துவா்கள், மருத்துவ மாணவா்களுடன் பேச்சு நடத்தினா். இதையடுத்து, அனைவரும் கலைந்து சென்றனா்.

பின்னா், இச்சம்பவம் குறித்து வேலூா் கிராமிய போலீஸாா் வழக்குப்பதிவு செய்து ராமுவை கைது செய்து விசாரணை நடத்தி வருகின்றனா்.