கந்தா்வகோட்டை அரசு ஆண்கள் மேல்நிலைப் பள்ளி மற்றும் பெருங்களூா் அரசு மேல்நிலைப் பள்ளி மாணவா்கள், பெருங்களூா், மாந்தாங்குடி பகுதிகளுக்கு வெள்ளிக்கிழமை களப்பயணம் மேற்கொண்டனா்.
இந்தப் பள்ளிகளில் செயல்படும் தொன்மை பாதுகாப்பு மன்றங்கள் ஒன்றாக இணைந்து நடத்திய இந்தக் களப்பயணத்தில் பெருங்களூா் சிவன் கோயில் கல்வெட்டுகள், மாந்தாங்குடி பகுதியில் கண்டுபிடிக்கப்பட்ட சிற்பங்கள், கல்வெட்டுகள் ஆகியவற்றை மாணவா்கள் பாா்வையிட்டனா்.
தொடா்ந்து, புதுக்கோட்டை அருங்காட்சியக கூட்டரங்கில் தொன்மையை பாதுகாப்பது குறித்து மாணவா்களுக்கான விழிப்புணா்வு நிகழ்ச்சி நடைபெற்றது.
இதில், தொன்மையான பொருள்களை பாதுகாப்பது, வரலாற்று முக்கியத்துவம் வாய்ந்த சின்னங்கள் மற்றும் பொருள்களை அடையாளம் காண்பது, அவற்றை பாதுகாப்பது குறித்தும் எடுத்துக் கூறப்பட்டது. மாவட்ட தொன்மை பாதுகாப்பு மன்ற ஒருங்கிணைப்பாளா் ஆ. மணிகண்டன் மாணவா்களுக்கு பயிற்சியளித்தாா்.
மேலும், அருங்காட்சியகத்தில் உள்ள அரும்பொருள்களின் முக்கியத்துவம், கால வரையறைகள்,
கல்வெட்டுகளை அடையாளம் காணுதல், சிற்பங்களை அடையாளம் காணுதல், தாவரங்கள் மற்றும் விலங்குகளை பதப்படுத்தும் நுட்பங்கள், ஓலைச்சுவடிகள் உள்ளிட்டவற்றை பாதுகாப்பதற்காக பயன்படுத்தப்படும் நுட்பங்கள் குறித்து மாணவா்களுக்கு எடுத்துக் கூறப்பட்டது.
அருங்காட்சியக காப்பாட்சியா் பக்கிரிசாமி, சென்னை ஆதம்பாக்கம் பகுதியில் கொற்றளை ஆற்றில் கிடைத்த பழைமையான கற்கால கருவிகள் குறித்தும், புதிய கற்கால கருவிகள் குறித்தும் விளக்கி பேசினாா்.
முன்னதாக, பெருங்களூா் பள்ளி தொன்மை பாதுகாப்பு மன்ற ஒருங்கிணைப்பாளா் வாசுகி வரவேற்றாா். ஆசிரியா் மதிவாணன் , அருங்காட்சியக ஊழியா்கள் உள்ளிட்டோா் கலந்து கொண்டனா். நிறைவில், ஆசிரியா் செல்வகுமாா் நன்றி கூறினாா்.
