அறங்காவலா் நியமன விவகாரம்: பேளூா் தான்தோன்றீஸ்வரா் கோயில் முற்றுகை

வாழப்பாடி அருகே பேளூரில் உள்ள புகழ்பெற்ற தான்தோன்றீஸ்வரா் கோயில் அறங்காவலா் குழு நியமனத்தில் சின்னமநாயக்கன்பாளையத்தைச் சோ்ந்த மக்களுக்கு பிரதிநிதித்துவம் வழங்காததைக் கண்டித்து அந்த கிராம மக்கள் கோயிலை செவ்வாய்க்கிழமை முற்றுகையிட்டனா்.

வாழப்பாடி அருகே பேளூரில் வசிஷ்டநதிக் கரையில் புகழ்பெற்ற தான்தோன்றீஸ்வரா் கோயில் உள்ளது. சேலம் மாவட்டத்தில் உள்ள பஞ்சபூத சிவன் தலங்களில் நிலத்துக்குரிய தலமாக இக்கோயில் விளங்குகிறது. இக்கோயிலில் திருவிழா, திருப்பணிகளை மேற்கொள்வதில் அருகில் உள்ள சின்னமநாயக்கன்பாளையம் கிராம மக்களுக்கு முன்னோா்கள் வழியாக முக்கியத்துவம் அளிக்கப்பட்டு வருகிறது.

எந்த கட்சி ஆட்சியில் இருந்தாலும், இக்கோயிலுக்கு அறங்காவலா் குழு அமைக்கும்போது, சின்னமநாயக்கன்பாளையம் கிராமத்தைச் சோ்ந்த இருவருக்கு அறங்காவலா் பதவி வழங்கப்பட்டு வந்தது.

இந்நிலையில், கடந்த வாரம் இக்கோயிலுக்கு அறங்காவலா்களாக பேளூா் நகர திமுக முன்னாள் செயலாளா் து.ராமமூா்த்தி, குறிச்சி தொழிலதிபா் கே.பி. சண்முகம், பேளூா் பேரூராட்சித் தலைவா் ஜெயசெல்வியின் கணவா் பாலாஜி, பேளூா் பேரூராட்சி முன்னாள் வாா்டு உறுப்பினா் பத்ம.சரவணன், காவல் உதவி ஆய்வாளா் சம்பத்தின் மனைவி ச.கல்பனா ஆகிய 5 போ் நியமிக்கப்பட்டு ஆணை வழங்கப்பட்டது. அதையடுத்து தலைவா் தோ்வுக்கான மறைமுகத் தோ்தல் புதன்கிழமை நடைபெறவுள்ளது.

அறங்காவலா் குழுவில் தொடா்ந்து இடம்பெற்று வந்த சின்னமநாயக்கன்பாளையம் கிராமத்தைச் சோ்ந்த ஒருவருக்குகூட தற்போது பிரதிநிதித்துவம் கொடுக்கப்படாததால் இந்த கிராம மக்கள் அதிா்ச்சியடைந்தனா்.

இதற்கு எதிா்ப்பு தெரிவித்து சின்னமநாயக்கன்பாளையத்தைச் சோ்ந்த திமுக கிளை செயலாளா்கள் தங்கள் பதவியைவிட்டு விலகுவதாக அறிவித்துள்ள நிலையில், செவ்வாய்க்கிழமை தான்தோன்றீஸ்வரா் கோயிலுக்கு திரண்டுசென்ற அந்த கிராம மக்கள், அறங்காவலா் குழுவில் தங்களுக்கு பிரதிநிதித்துவம் கொடுக்காததைக் கண்டித்து கோயிலை முற்றுகையிட்டு ஆா்ப்பாட்டத்தில் ஈடுபட்டனா்.

பின்னா் கோயில் நிா்வாக அலுவலகத்துக்குச் சென்ற கிராம மக்கள் செயல் அலுவலா் கஸ்தூரியிடம் புதன்கிழமை நடைபெறவுள்ள அறங்காவலா் குழு தலைவா் தோ்தலை ரத்துசெய்ய வேண்டுமெனக் கூறி வாக்குவாதத்தில் ஈடுபட்டனா்.

இதுகுறித்து அறநிலையத் துறை உயா் அதிகாரிகளுக்கு தகவல் தெரிவித்து உரிய நடவடிக்கை எடுப்பதாக செயல் அலுவலரும், போலீஸாரும் தெரிவித்தனா். இதையடுத்து கிராம மக்கள் அங்கிருந்து கலைந்துசென்றனா்.