கோவை மாவட்ட ஆட்சியரின் பயிற்சித் திட்டம், குமரகுரு பன்முக கலை, அறிவியல் கல்லூரி ஆகியவை சாா்பில் கல்லூரி மாணவா்களுக்கான இன்டா்ன்ஷிப் திட்டம் புதன்கிழமை தொடங்கப்பட்டது.
குமரகுரு கல்லூரி வளாகத்தில் இத்திட்டத்தை தொடங்கிவைத்து மாவட்ட ஆட்சியா் பவன்குமாா் க.கிரியப்பனவா் பேசியதாவது: இந்தத் திட்டத்தில் தோ்வு செய்யப்பட்ட மாணவா்களுக்கு மாவட்ட நிா்வாகம் சாா்பில் 45 நாள்கள் பல்வேறு பயிற்சிகள் அளிக்கப்பட உள்ளன.
இது மாணவா்களுக்கு மாவட்ட அளவிலான ஆட்சி மற்றும் பொது சேவைக்கு நேரடி வெளிப்பாட்டை வழங்குகிறது. இந்தத் திட்டம் பொது சேவை விநியோகம் மற்றும் குறைபாடுகளைத் தீா்க்கும் நடவடிக்கைகளில் உள்ள சவால்கள் மற்றும் நுணுக்கங்களை புரிந்துகொள்ள உதவும். வருவாய், கிராமப்புற வளா்ச்சி மற்றும் நகராட்சி நிா்வாகம் உள்ளிட்ட பல்வேறு துறைகளில் பணியாற்றுவதன் மூலமாக அரசு எவ்வாறு செயல்படுகிறது என்ற விரிவான புரிதல்களை மாணவா்கள் பெறுவாா்கள் என்றாா்.
இந்நிகழ்ச்சியில், குமரகுரு பன்முக கலை, அறிவியல் கல்லூரியின் துறைத் தலைவரும், அரசு மற்றும் தொழில் கூட்டாண்மைத் தலைவரான என்.பாலு, மாவட்ட ஆட்சியரின் நோ்முக உதவியாளா் நிறைமதி உள்ளிட்டோா் கலந்துகொண்டனா். முன்னதாக, இந்தத் திட்டத்தின்கீழ் பயிற்சி பெற பல்வேறு கல்லூரிகளில் இருந்து 50 மாணவா்கள் தோ்வு செய்யப்பட்டனா்.
கல்லூரி முதல்வா் சி.தீபேஷ் நன்றியுரையாற்றினாா்.
