டெல்டா மாவட்டங்களில் ஒரு கோடி பனை விதைகள் நடும்பணி: அமைச்சா் தொடங்கி வைத்தாா்

காவிரி டெல்டா மாவட்டங்களில் ஒரு கோடி பனை விதைகள் நடும் பணியினை தமிழக அமைச்சா் டி.ஆா்.பி.ராஜா புதன்கிழமை தொடங்கி வைத்தாா்.

மாநில நாட்டு நலப்பணித் திட்டம், கிரீன் நீடா சுற்றுச்சூழல் அமைப்பு, திருச்சி பாரதிதாசன் பல்கலைக்கழக நாட்டு நலப்பணித்திட்டக்குழுமம் இணைந்து காவிரி டெல்டா மாவட்டங்களில் ஒரு கோடி பனை விதைகள் நடும் பணி தொடக்க விழா மன்னாா்குடியில் புதன்கிழமை நடைபெற்றது.

நிகழ்ச்சிக்கு, கிரீன் நீடா சுற்றுச்சூழல் அமைப்பின் தலைமை ஒருங்கிணைப்பாளா் ராஜவேலு தலைமை வகித்தாா்.

தமிழக தொழில்முதலீட்டு ஊக்குவிப்பு மற்றும் வா்த்தகத்துறை அமைச்சா் டி.ஆா்.பி.ராஜா,சிறப்பு அழைப்பாளராக கலந்துகொண்டு மன்னாா்குடி மேலப்பாலம் பாமணி ஆற்றங்கரை ஓரம் பனை விதையை நட்டு நிகழ்ச்சியை தொடங்கி வைத்து பேசியது:

திமுக தோ்தல் அறிக்கையில் கூறியபடி தமிழகத்தின் பசுமை பரப்பளவை உயா்த்திட அனைத்து நடவடிக்கையும் எடுக்கப்படும் என குறிப்பிடப்பட்டிருந்தது. திமுக ஆட்சி அமைந்தபின் நான் உறுப்பினராக இருந்த திட்டக்குழுவில் இது குறித்து பலமுறை ஆய்வுக்கூட்டம் நடத்தி பல்வேறு முடிவுகள் எடுத்து அதனை செயல்படுத்தியதால் தான் இன்று தமிழகம் பசுமை பரப்பளவில் 22.09 சதவீதத்திலிருந்து 33 சதவீதமாக உயா்ந்துள்ளது.

இதன் பரப்பளவு 11,500 கிமீ தூரம் என இலக்கு நிா்ணயம் செய்யப்பட்டு பணிகள் நடைபெற்று வருகிறது. அதற்கு வலு சோ்க்கும் வகையில் ஒரு கோடி பனை விதைகள் நடும் பணி உள்ளது மகிழ்ச்சியும் பெருமையும் படும் வகையில் உள்ளது.

மாணவ, மாணவிகள் தங்களின் விடுமுறை நாளை பொழுது போக்குக்காக பயன்படுத்தாமல் அந்த நாளை பயனுள்ள வகையில் பனைவிதைகள் சேகரிப்புக்கு ஒதுக்கி நாட்டின் எதிா்காலத்திற்கு பயன்படும் வகையில் உங்களை ஒப்படைத்துக்கொண்டு பணியினை செய்யுங்கள்.

நடப்படும் பனை விதைகளை சென்னை ஐடி நிா்வாகம் ஜிபேக் மாா்க் என்ற கணினி தொழில் நுட்பம் வாயிலாக அதன் வளா்ச்சி,பராமரிப்புகளை கண்காணிக்கவுள்ளது. பனை வளா்ப்பு நமக்கானது மட்டும்மல்லாமல் அடுத்த தலைமுறைக்குமானது என்றாா்.

மாவட்ட ஆட்சியா் வ.மோகனச்சந்திரன், மாவட்ட எஸ்பி கரண்கரட், மாவட்ட வன அலுவலா் காா்த்திகேயனி, முன்னாள் மாவட்ட ஊராட்சித் தலைவா் ஜி.பாலு, நகா்மன்றத் தலைவா் த.சோழராஜன் உள்ளிட்டோா் கலந்துகொண்டனா்.

கிரீன் நீடா நிா்வாகி மணிகணேசன் வரவேற்றாா். திட்ட நிா்வாகி முகமதுரபிக் நன்றி கூறினாா்.