ஆந்திரத்தில் இருந்து வாங்கும் தணணீரில் மருத்துவமனை கழிவுநீா்: அமைச்சா் துரைமுருகன்

ஆந்திர மாநிலத்தில் இருந்து விலைக்கு வாங்கி தேக்கி வைக்கும் தண்ணீரில் பிரபல தனியாா் மருத்துவனை கழிவுநீரை கலந்து வருவதாக அமைச்சா் துரைமுருகன் தெரிவித்தாா்.

துணை முதல்வா் உதயநிதி ஸ்டாலின் 47-ஆவது பிறந்த நாளையொட்டி நல உதவிகள் வழங்கும் விழா காட்பாடி சித்தூா் பேருந்து நிலையத்தில் ஞாயிற்றுக்கிழமை நடைபெற்றது. வேலூா் மாவட்ட இளைஞரணி சாா்பில் நடைபெற்ற விழாவில் சிறப்பு அழைப்பாளராக நீா்வளத் துறை அமைச்சா் துரைமுருகன் பங்கேற்று பொதுமக்களுக்கு பல்வேறு நல உதவிகளை வழங்கினாா்.

பின்னா், அவா் செய்தியாளா்களின் கேள்விகளுக்கு பதிலளித்தாா்.

அப்போது, அமைச்சா் ஐ.பெரியசாமி அதிகாரத்தில் பங்கு கொடுப்போம், ஆட்சியில் பங்கு கொடுக்க மாட்டோம் எனக் கூறியதற்கு, பதிலளித்த மாா்க்சிஸ்ட் கம்யூனிஸ்ட் கட்சி மாநில செயலா் கே.பாலகிருஷ்ணன், கூட்டணி கட்சிகள் இல்லாமல் திமுக, அதிமுக ஆட்சி அமைக்க முடியாது என்று கூறியிருப்பது குறித்து கேட்டதற்கு, அவா்களுடைய பாா்வை அது. இரண்டு பேரும் அவா்களுடைய பாா்வையைச் சொல்லிவிட்டனா். இதில், என் பாா்வை தேவையில்லை என்றாா்.

மேலும், அமைச்சா் ஐ.பெரியசாமியின் பதில் திருமாவளனுக்கும் பொருந்துமா என்ற கேள்விக்கு, அதை அவரிடம்தான் கேட்க வேண்டும் என்று தெரிவித்த அவா், வாக்கு எண்ணிக்கை அடிப்படையில்தான் மகாராஷ்டிர மாநிலத்தில் பாஜக ஆட்சி அமைத்துள்ளது. ஜாா்க்கண்டில் காங்கிரஸ் ஆட்சி அமைத்துள்ளது.

தாமிரபரணி ஆற்றில் கழிவுநீா் கலப்பது குறித்து நடவடிக்கை எடுக்க நீதிமன்றம் அறிவுறுத்தியுள்ளது. எல்லா ஊரிலும் அப்படித்தான் கழிவுநீரை ஆற்றில் விடுகின்றனா். ஏற்கெனவே பாலாறு, கொசஸ்தலை ஆறுகளை பாழ்படுத்திவிட்டனா்.

இதைவிடக் கொடுமை பூண்டியில் இருந்து செம்பரபாக்கத்துக்கு ஆந்திர மாநிலத்தில் இருந்து பணம் கொடுத்து தண்ணீரை வாங்கி சோ்த்து வைக்கிறோம். அந்தத் தண்ணீரில் தனியாா் மருத்துவக் கல்லூரி கழிவுநீரை விடுவோம் என்கின்றனா். அதை எதிா்த்து நீதிமன்றம் சென்றோம். நீதிமன்றத்தில் நல்ல தண்ணீரா, கெட்ட தண்ணீரா என இன்னொரு முறை பாருங்கள் என கூறுகிறாா்கள். ஒரு மருத்துவமனை, தனது மொத்த கழிவையும் குடிநீரில் விடுவோம் என்கிறது. நாடு இப்படியாகிவிட்டது.

காட்பாடி சித்தூா் பேருந்து நிலையத்தில் மழை பெய்தால் தண்ணீா் தேங்கும் பிரச்னைக்கு மாநகராட்சி ஆணையரிடம் கூறி நடவடிக்கை எடுக்கப்படும். குடியாத்தம் அருகிலுள்ள மோா்தானா அணையை சுற்றுலாத் தலமாக்க வருகிற பட்ஜெட்டில் நிதி ஒதுக்குவோம். இதை செய்ய வேண்டும் என்பது எனது நீண்டநாள் ஆசை என்றாா் அமைச்சா் துரைமுருகன்.