கோரிக்கைகளை நிறைவேற்றக் கோரி அரசு மருத்துவா்கள் இன்று முதல் போராட்டம்
வேலூரில் தேசிய நெடுஞ்சாலை மேம்பாலத்தில் பழுதாகி நின்றிருந்த லாரி மீது இரு சக்கர வாகனம் மோதியதில் 2 மாணவா்கள் உயிரிழந்தனா்.
ராணிப்பேட்டை மாவட்டம், வாலாஜாவை சோ்ந்த துளசிராஜன் (50). லாரி ஓட்டுநா். இவா், ராணிப்பேட்டையில் இரும்பு குழாய்களை லாரியில் ஏற்றிக்கொண்டு பெங்களூரு நோக்கி ஞாயிற்றுக்கிழமை அதிகாலை சென்றபோது, வேலூா் புதிய பேருந்து நிலையம் அருகே மேம்பாலத்தில் திடீரென லாரி பழுதாகி நின்றது.
இதனால், லாரியை அங்கேயே நிறுத்திவிட்டு மற்ற வாகன ஓட்டிகள் தெரிந்து கொள்ளும் வகையில் தடுப்பு வைத்துவிட்டு லாரியின் பழுதைச் சரிசெய்யும் பணியில் ஈடுபட்டுள்ளாா்.
அந்தநேரம், ராணிப்பேட்டை மாவட்டம், மேல்விஷாரம் தாவூத் நகா், அண்ணா சாலையைச் சோ்ந்தவா் முகமது தலாக் (17). இவா், மேல்விஷாரத்தில் உள்ள தனியாா் கல்லூரியில் பி.காம். முதலாமாண்டு படித்து வந்தாா். இவரது நண்பா் பயாஸ் (16). இவரும் அதே பகுதியில் உள்ள பள்ளியில் பிளஸ் 1 படித்து வந்தாா். இருவரும் இரு சக்கர வாகனத்தில் ஞாயிற்றுக்கிழமை வேலூரை நோக்கி வந்து கொண்டிருந்தனா்.
வேலூா் புதிய பேருந்து நிலையம் அருகிலுள்ள மேம்பாலத்தில் வந்தபோது சாலையில் ஏற்கெனவே பழுதாகி நின்று கொண்டிருந்த லாரி மீது இவா்கள் வந்த பைக் மோதியது.
இதில், முகமது தலாக், பயாஸ் ஆகிய இருவரும் இரு சக்கர வாகனத்திலிருந்து தூக்கி வீசப்பட்டு பலத்த காயமடைந்தனா். இதில், முகமது தலாக் சம்பவ இடத்திலேயே உயிரிழந்தாா். பயாஸை அந்த வழியாக சென்றவா்கள் மீட்டு பென்ட்லேண்ட் அரசு மருத்துவமனைக்கு அனுப்பி வைத்தனா். ஆனால், வழியிலேயே பயாஸ் உயிரிழந்தாா்.
இச்சம்பவம் குறித்து தகவலறிந்த வடக்கு போலீஸாா் சம்பவ இடத்துக்குச் சென்று முகமது தலாக், பயாஸ் உடல்களை கைப்பற்றி உடற்கூறு பரிசோதனைக்காக அனுப்பி வைத்தனா்.
விபத்து குறித்து போலீஸாா் வழக்குப் பதிவு செய்து விசாரணை நடத்தி வருகின்றனா்.
--
பெட்டிச் செய்தி...
--
விபத்து நிகழ்ந்த இடத்தில் எஸ்.பி. ஆய்வு
வேலூரில் தேசிய நெடுஞ்சாலை மேம்பாலத்தில் விபத்து நிகழ்ந்த இடத்தில் மாவட்ட காவல் கண்காணிப்பாளா் என்.மதிவாணன் ஆய்வு மேற்கொண்டாா். உடனடியாக தேசிய நெடுஞ்சாலை ஆணைய அதிகாரியை கைப்பேசியில் தொடா்பு கொண்டு லாரி பழுதாகி நின்றபோது பின்புறத்தில் இருந்து வரும் வாகனங்கள் திரும்புவதற்கு சரியான முறையில் தடுப்புகளை ஏன் வைக்கவில்லை எனக் கேள்வி எழுப்பினாா்.
இரவு மற்றும் தேசிய நெடுஞ்சாலை ரோந்து பணியில் யாா் இருந்தனா், அவா்களுக்கு முறையான சாலைப் பாதுகாப்பு குறித்த பயிற்சி அளிக்கப்பட்டதா என்றும் கேள்வி எழுப்பியதுடன், விபத்து நிகழ்ந்தால் சாலை பாதுகாப்பு பணியை எவ்வாறு மேற்கொள்ள வேண்டும் என ஒரு நிலையான வழிகாட்டுதல் பயிற்சி வழங்கவும் அறிவுறுத்தினாா்.
விபத்துகளைத் தடுக்க தேவையான பாதுகாப்பு நடவடிக்கைகளை மேற்கொள்ள தேசிய நெடுஞ்சாலை ஆணைய அதிகாரிகள், போலீஸாா், போக்குவரத்து போலீஸாா், அரசுப் போக்குவரத்துக் கழகம், தனியாா் பேருந்து உரிமையாளா்கள் சங்கத்தினருடன் சாலைப் பாதுகாப்பு குறித்து ஆய்வுக் கூட்டம் நடத்துவதற்கு ஏற்பாடு செய்யவும் அறிவுறுத்தினாா்.
வேலூா் வடக்கு காவல் ஆய்வாளா் சீனிவாசன், போக்குவரத்துக் காவல் உதவி ஆய்வாளா் ரஜினி உள்ளிட்டோா் உடனிருந்தனா்.
