காவிரி கூட்டு குடிநீா் திட்ட குழாயை மாற்றி அமைக்க நடவடிக்கை: குடிநீா் வடிகால் வாரிய மேலாண் இயக்குநா்

பொய்கை அருகே பாலாற்றின் குறுக்கே தடுப்பணை கட்டப்பட்டு வரும் இடத்தில் காவிரி கூட்டு குடிநீா் திட்ட தன்னோட்ட குழாயை மாற்றி அமைக்கும் பணிகள் தொடா்பாக தமிழ்நாடு குடிநீா் வடிகால் வாரிய மேலாண்மை இயக்குநா் தட்சிணாமூா்த்தி, வேலூா் ஆட்சியா் வி.ஆா்.சுப்புலட்சுமி ஆகியோா் ஆய்வு செய்தனா்.

ஒருங்கிணைந்த வேலூா் மாவட்டத்தில் உள்ள வேலூா் மாநகராட்சி, திருப்பத்தூா் , ஜோலாா்பேட்டை, வாணியம்பாடி, ஆம்பூா், போ்ணாம்பட்டு, குடியாத்தம், மேல்விசாரம், ஆற்காடு, ராணிப்பேட்டை, வாலாஜாபேட்டை, அரக்கோணம் ஆகிய 11 நகராட்சிகள், நாட்டறம்பள்ளி, உதயேந்தரம், ஆலங்காயம், ஒடுக்கத்தூா், பள்ளிகொண்டா ஆகிய 5 பேரூராட்சிகள் மற்றும் 944 வழியோர ஊரக குடியிருப்புகளுக்கு பாதுகாக்கப்பட்ட குடிநீா் வழங்கும் வகையில் காவிரி ஆற்றை நீராதாரமாகக் கொண்டு வேலூா் கூட்டுக் குடிநீா் திட்டம் செயல்படுத்தப்பட்டு வருகிறது.

தமிழ்நாடு குடிநீா் வடிகால் வாரியம் மூலம் பராமரிக்கப்பட்டு வரும் திட்டத்தில் ஒரு பகுதியாக தன்னோட்டக் குழாய்கள் பாலாற்றின் தென்கரையோரம் வாணியம்பாடியில் இருந்து ஓச்சேரி வரை பதிக்கப்பட்டுள்ளன. இதனிடையே, வேலூா் மாவட்டம், அணைக்கட்டு வட்டம், பொய்கை கிராமம் அருகே பாலாற்றின் குறுக்கே தடுப்பணை கட்ட நிா்வாக ஒப்புதல் வழங்கப்பட்டுள்ளது.

இந்த தடுப்பணை கட்ட வேண்டிய பொய்கை பகுதியில் 1200 எம்எம் விட்டமுள்ள எம்எஸ் தன்னோட்டக் குழாய்கள் பதிக்கப்பட்டுள்ளதால், நீா்வள ஆதாரத்துறை இந்த குழாய்களை மாற்றி அமைக்க அறிவுறுத்தியுள்ள நிலையில் புதிய குழாய்களை பாலாற்று கரையோரம் சுமாா் 150 மீட்டா் தொலைவுக்கு தடுப்பனை கட்ட இடையூறு ஏற்படாத வகையில் மாற்றி அமைக்கும் பணி மேற்கொள்ளப்படுகிறது. இப்பணி மேற்கொள்ள ரூ.93.28 லட்சத் துக்கு திட்ட மதிப்பீடும் தயாரிக்கப்பட்டு ஒப்பந்தப்புள்ளி கோரப்பட்டுள்ளது.

இந்நிலையில், பொய்கை கிராமம் அருகே பாலாற்றின் குறுக்கே தடுப்பணை கட்டப்பட்டு வரும் இடத்தில் காவிரி கூட்டு குடிநீா் திட்ட தன்னோட்ட குழாயை மாற்றி அமைப்பது குறித்து வாரிய மேலாண்மை இயக்குநா் தட்சிணாமூா்த்தி, ஆட்சியா் வி.ஆா்.சுப்புலட்சுமி ஆகியோா் ஆய்வு செய்தனா். மேலும், இப்பணிகளை டிசம்பா் மாத இறுதிக்குள் முடிக்கவும் குடிநீா் வடிகால் வாரிய மேலாண்மை இயக்குநா் தட்சிணாமூா்த்தி அலுவலா்களுக்கு அறிவுறுத்தினாா்.

ஆய்வின்போது தமிழ்நாடு குடிநீா் வடிகால் வாரிய முதன்மைப் பொறியாளா் ஆறுமுகம், கண்காணிப்பு பொறியாளா் அன்பழகன், செயற்பொறியாளா்கள் நித்தியானந்தம், துளசிராமன், நீா்வளத்துறை செயற்பொறியாளா் பிரபாகரன், வேலூா் கோட்டாட்சியா் இரா.பாலசுப்பிரமணியன் உள்ளிட்டோா் உடனிருந்தனா்.