கடந்த 2024-ஆம் ஆண்டில் இந்தியாவின் ராணுவச் செலவினம் பாகிஸ்தானின் செலவினத்தை விட கிட்டத்தட்ட ஒன்பது மடங்கு அதிகமாக இருந்தது என்று ஸ்விட்சா்லாந்தைச் சோ்ந்த ‘சிப்ரி’ அமைப்பு திங்கள்கிழமை வெளியிட்ட ஆய்வு முடிவில் தெரியவந்துள்ளது.
ஸ்டாக்ஹோம் சா்வதேச அமைதி ஆராய்ச்சி நிறுவனம் (சிப்ரி), ‘2024-ஆம் ஆண்டுக்கான உலக ராணுவ செலவினங்களின் போக்குகள்’ என்ற தலைப்பில் தனது ஆய்வு முடிவுகளை அறிக்கையாக வெளியிட்டுள்ளது.
அந்த அறிக்கையில் குறிப்பிட்டுள்ள தகவலின்படி, 2024-ஆம் ஆண்டில், உலக ராணுவச் செலவினம் 2.71 லட்சம் கோடி டாலரை எட்டியது. இது 2023-ஆம் ஆண்டை விட 9.4% அதிகமாகும். பனிப்போா் முடிவடைந்ததிலிருந்து காணப்படும் மிக உயா்ந்த வருடாந்திர அதிகரிப்பு இதுவாகும்.
முதல் 5: ராணுவச் செலவினங்களில் அமெரிக்கா, சீனா, ரஷியா, ஜொ்மனி, இந்தியா ஆகிய நாடுகள் உலக அளவில் முதல் ஐந்து இடங்களில் உள்ளன. உலகளாவிய மொத்த ராணுவச் செலவினங்களில் இந்த 5 நாடுகள் மட்டும் 60% (1.63 லட்சம் கோடி டாலா்) பங்கு கொண்டுள்ளன.
உலகிலேயே அதிகபட்சமாக அமெரிக்கா தனது ராணுவத்துக்காக 99,700 கோடி டாலா் செலவிட்டுள்ளது. இது உலகின் மொத்த ராணுவ செலவினத்தில் 37 சதவீதமாகும்.
இந்தியா-பாகிஸ்தான்: உலக அளவில் 5-ஆவது மிகப் பெரிய நாடான இந்தியா 8,610 கோடி டாலா் ராணுவத்துக்காக செலவிடுகிறது. இந்தியாவுடன் ஒப்பிடுகையில் அண்டை நாடான பாகிஸ்தான் 1,020 கோடி டாலா் மட்டுமே செலவிட்டுள்ளது.
சீனா: கடந்த ஆண்டில் சீனாவின் ராணுவச் செலவினம் 7% அதிகரித்து 31,400 கோடி டாலராக மதிப்பிடப்பட்டுள்ளது. கடந்த 30 ஆண்டுகளாக, சீனாவின் ராணுவச் செலவினம் தொடா்ந்து அதிகரித்து வருகிறது.
ஆசியா மற்றும் பெருங்கடல் பகுதியில் உள்ள அனைத்து நாடுகளின் ராணுவச் செலவினங்களில் சீனா மட்டும் 50% பங்காற்றுகிறது. ராணுவத்தைத் தொடா்ந்து நவீனமயமாக்குதல், இணையவழி போா்த்திறன் மற்றும் அணு ஆயுதங்களை விரிவுபடுத்துவதில் சீனா அதிக முதலீடு செய்துள்ளது.
ஐரோப்பா: ரஷியாவை உள்ளடக்கிய ஐரோப்பிய கண்டத்தில் ராணுவச் செலவினம் 17% அதிகரித்து 69,300 கோடி டாலராக உள்ளது. கடந்த ஆண்டின் உலகளாவிய அதிகரிப்புக்கு ஐரோப்பிய கண்டம் முக்கிய பங்களிப்பாளராக இருந்துள்ளது.
ஐரோப்பிய நாடுகளில் குறிப்பிடத்தக்க வகையில் ஜொ்மனியின் ராணுவச் செலவு 28% அதிகரித்து 8,850 கோடி டாலராக உயா்ந்துள்ளது. இது மத்திய மற்றும் மேற்கு ஐரோப்பாவில் மிகப்பெரிய செலவினமாகவும், உலகின் நான்காவது பெரிய செலவினமாகவும் உள்ளது. அதேபோல், போலந்தின் ராணுவச் செலவு 31% அதிகரித்து 3,800 கோடி டாலராக அதிகரித்துள்ளது, இது அந்த நாட்டின் மொத்த உள்நாட்டு உற்பத்தியில் (ஜிடிபி) 4.2 சதவீதமாகும்.
ரஷியா-உக்ரைன்: ரஷியா-உக்ரைன் போா் மூன்றாவது ஆண்டை கடந்துள்ள நிலையில், ரஷியாவின் ராணுவச் செலவு 14,900 கோடி டாலரை எட்டியுள்ளது. இது முந்தைய 2023-ஆம் ஆண்டைவிட 38 சதவீதம் அதிகமாகும் மற்றும் 2015-ஆம் ஆண்டைவிட இரு மடங்காகும். ரஷியாவின் ராணுவச் செலவினம், அந்த நாட்டின் ஜிடிபியில் 7.1% மற்றும் மொத்த அரசு செலவினத்தில் 19 சதவீதமாகும்.
அதேநேரம், உக்ரைனின் மொத்த ராணுவச் செலவு 2.9% அதிகரித்து 6,470 கோடி டாலராக உள்ளது. இது ரஷியாவின் செலவினத்தில் 43 சதவீதமாகும். நாட்டின் ஜிடிபியில் 34 சதவீதமாக, உக்ரைன் கடந்த ஆண்டில் வேறு எந்த நாட்டுடனும் ஒப்பிட முடியாத வகையில் மிகப்பெரிய பொருளாதாரப் பங்கை ராணுவத்துக்காக ஒதுக்கியுள்ளது.
அதாவது, உக்ரைன் தற்போது தனது அனைத்து வரி வருவாயையும் ராணுவத்துக்குச் செலவிடுகிறது. அந்த வகையில், உக்ரைன் தனது ராணுவச் செலவினங்களை தொடா்ந்து அதிகரிப்பது உள்நாட்டு பொருளாதாரத்துக்குச் சவாலாக இருக்கும் என்று வல்லுநா்கள் கூறுகின்றனா்.
