இலங்கைக்கு கடத்த முயற்சி: 14.4 டன் மூட்டைகள், 2.4 டன் பீடி இலைகள் பறிமுதல்: 9 போ் கைது

இலங்கைக்கு கடத்துவதற்காக தூதூக்குடி மாவட்டம் குளத்தூா் அருகே கிடங்கில் பதுக்கி வைக்கப்பட்டிருந்த 14.4 டன் உர மூட்டைகள், ரூ. 60 லட்சம் மதிப்பிலான 2.2 டன் பீடி இலைகள் ஆகியவற்றை பறிமுதல் செய்து, இதுதொடா்பாக 9 பேரை போலீஸாா் கைது செய்தனா்.

குளத்தூா் அருகேயுள்ள தளவாய்புரம் கிராமத்தில் தூத்துக்குடி மாப்பிள்ளையூரணியை சோ்ந்த ஜெயக்குமாா் (55) என்பவரது பொருள் சேமிப்பு கிடங்கு உள்ளது. இங்கு ஓட்டப்பிடாரம் வட்டார வேளாண் உர ஆய்வாளா் சிவகாமி, வேளாண் தர கட்டுப்பாடு உதவி இயக்குநா் கண்ணன் ஆகியோா் தலைமையிலான அதிகாரிகள் போலீஸ் பாதுகாப்புடன் புதன்கிழமை சோதனையிட்டனா். அப்போது அங்கு ரூ. 5 லட்சம் மதிப்புள்ள 14,400 கிலோ யூரியா மூட்டைகள் 299 , இலங்கைக்கு கடத்துவதற்காக ரூ. 60 லட்சம் இலங்கை மதிப்புள்ள 2,400 கிலோ பீடி இலை பண்டல்கள் ஆகியவை பதுக்கி வைக்கப்பட்டிருந்தது தெரியவந்தது.

இதுகுறித்து உர ஆய்வாளா் அளித்த புகாரின் பேரில் குளத்தூா் போலீஸாா், உர மூட்டைகளையும், பீடை இலை பண்டல்களையும் பறிமுதல் செய்தனா்.

மேலும், இது தொடா்பாக, தூத்துக்குடி ஆரோக்கியபுரத்தைச் சோ்ந்த ராஜேஷ் குமாா் (35), அரவிந்த் (22), சிலுவைப்பட்டி முருகேசன் (43), மேலூா் அந்தோணி காா்த்திக் (27), கிருஷ்ணராஜபுரம் அப்துல் ரகுமான் (24) அந்தோணி கனிராஜ் (42), திண்டுக்கல் மாவட்டம் நாகூா் நகா் காா்த்திக் (39), திருவள்ளூா் மாவட்டம் பூந்தமல்லியைச் சோ்ந்த செய்யது அலி (35), புதுக்கோட்டை மாவட்டம் திருகோகா்ணத்தைச் சோ்ந்த அசன் பாட்ஷா (50) ஆகிய 9 பேரை கைது செய்தனா். கிடங்கு உரிமையாளா் ஜெயக்குமாா் , மதுரையை சோ்ந்த லாரி உரிமையாளா் அருள் ஜேக்கப், கற்குவேல் அய்யனாா், பைரம் கான், சிவக்குமாா் ஆகிய 5 பேரை தனிப்படை அமைத்து போலீஸாா் தேடி வருகின்றனா்.