இலங்கைக்கு எதிரான முதல் டி20 போட்டியில் நியூசிலாந்து அணி 8 ரன்கள் வித்தியாசத்தில் வெற்றி பெற்றது.
இலங்கை அணி நியூசிலாந்தில் சுற்றுப்பயணம் மேற்கொண்டு விளையாடி வருகிறது. இரு அணிகளுக்கும் இடையிலான டி20 தொடர் முதலில் நடைபெறுகிறது. இரு அணிகளுக்கும் இடையிலான முதல் டி20 போட்டி இன்று நடைபெற்றது. இந்தப் போட்டியில் டாஸ் வென்ற இலங்கை அணி பந்துவீச்சைத் தேர்வு செய்ய, நியூசிலாந்து அணி முதலில் விளையாடியது.
இதையும் படிக்க: 2024 - டி20 சாம்பியன் முதல் உலக செஸ் சாம்பியன் வரை... முக்கிய நிகழ்வுகள் ஒரு பார்வை!
நியூசிலாந்து - 172/8
முதலில் விளையாடிய நியூசிலாந்து அணி நிர்ணயிக்கப்பட்ட 20 ஓவர்களின் முடிவில் 8 விக்கெட்டுகளை இழந்து 172 ரன்கள் எடுத்தது. அந்த அணியில் முன்வரிசை ஆட்டக்காரர்கள் பெரிதாக ரன்கள் குவிக்கவில்லை. டிம் ராபின்சன் (11 ரன்கள்), ரச்சின் ரவீந்திரா (8 ரன்கள்), மார்க் சாப்மேன் (15 ரன்கள்), கிளன் பிளிப்ஸ் (8 ரன்கள்) மற்றும் மிட்செல் ஹே (0 ரன்) எடுத்து ஆட்டமிழந்தனர். நியூசிலாந்து அணி 65 ரன்களுக்கு 5 விக்கெட்டுகளை இழந்து தடுமாறியது.
இந்த நிலையில், டேரில் மிட்செல் மற்றும் மைக்கேல் பிரேஸ்வெல் ஜோடி சேர்ந்தனர். இந்த இணை சிறப்பாக விளையாடி அணியை சரிவிலிருந்து மீட்டது. சிறப்பாக விளையாடிய இருவரும் அரைசதம் கடந்து அசத்தினர். டேரில் மிட்செல் 42 பந்துகளில் 62 ரன்கள் எடுத்தார். அதில் 4 பவுண்டரிகள் மற்றும் 2 சிக்சர்கள் அடங்கும். மைக்கேல் பிரேஸ்வெல் 33 பந்துகளில் அதிரடியாக 59 ரன்கள் குவித்தார். அதில் 4 பவுண்டரிகள் மற்றும் 4 சிக்ஸர்கள் அடங்கும்.
இலங்கை தரப்பில் பினுரா ஃபெர்னாண்டோ, மஹீஷ் தீக்ஷனா மற்றும் வனிந்து ஹசரங்கா தலா இரண்டு விக்கெட்டுகளைக் கைப்பற்றினர். மதீஷா பதிரான ஒரு விக்கெட்டினைக் கைப்பற்றினார்.
இதையும் படிக்க: முட்டாள்தனமான ஷாட்..! ரிஷப் பந்த்தினை கடுமையாக விமர்சித்த முன்னாள் வீரர்!
நியூசிலாந்து வெற்றி
173 ரன்கள் எடுத்தால் வெற்றி என்ற இலக்கை நோக்கி களமிறங்கிய இலங்கை அணி, 20 ஓவர்களின் முடிவில் 8 விக்கெட்டுகளை இழந்து 164 ரன்கள் மட்டுமே எடுத்தது. இதன் மூலம், 8 ரன்கள் வித்தியாசத்தில் இலங்கை அணி தோல்வியைத் தழுவியது. இலங்கை அணிக்கு தொடக்க ஆட்டக்காரர்கள் சிறப்பான தொடக்கத்தைத் தந்த போதிலும், அதன் பின் களமிறங்கிய வீரர்கள் அனைவரும் மோசமான ஆட்டத்தை வெளிப்படுத்தியதால், இலங்கை அணி தோல்வியைத் தழுவியது. தொடக்க ஆட்டக்காரர்களான பதும் நிசங்கா 60 பந்துகளில் 90 ரன்களும் (7 பவுண்டரிகள், 3 சிக்ஸர்கள்), குசல் மெண்டிஸ் 36 பந்துகளில் 46 ரன்களும் (6 பவுண்டரிகள், ஒரு சிக்ஸர்) எடுத்து ஆட்டமிழந்தனர்.
14-வது ஓவரின்போது 121 ரன்கள் எடுத்து வெறும் 2 விக்கெட்டுகளை மட்டும் இழந்திருந்த இலங்கை அணி, அடுத்த 38 ரன்களுக்கு 6 விக்கெட்டுகளை இழந்தது. தொடக்க ஆட்டக்காரர்களை தவிர்த்து மற்ற வீரர்கள் அனைவரும் ஒற்றை இலக்க ரன்களில் ஆட்டமிழந்தனர்.
நியூசிலாந்து தரப்பில் ஜேக்கோப் டஃபி 3 விக்கெட்டுகளைக் கைப்பற்றினார். மாட் ஹென்றி மற்றும் ஸகாரி ஃபோல்க்ஸ் தலா 2 விக்கெட்டுகளைக் கைப்பற்றினர்.
இதையும் படிக்க: புஷ்பா பட பாணியில் கொண்டாடிய நிதீஷ் குமார் ரெட்டி!
இந்த வெற்றியின் மூலம் 3 போட்டிகள் கொண்ட டி20 தொடரில் நியூசிலாந்து அணி 1-0 என்ற கணக்கில் முன்னிலை பெற்றுள்ளது.
