‘உங்களைத் தேடி உங்கள் ஊரில் திட்டம் முகாம்’: ஆட்சியா் ஆய்வு

பெரியகுளம் பகுதியில் ‘உங்களைத் தேடி உங்கள் ஊரில் திட்டம் முகாம் புதன்கிழமை நடைபெற்றது.

பெரியகுளம் சாா் ஆட்சியா் கூட்டரங்கில் நடைபெற்ற இந்த முகாமுக்கு மாவட்ட ஆட்சியா் ரஞ்ஜீத் சிங் தலைமை வகித்தாா். இதில் மாவட்ட வருவாய் அலுவலா் மகாலட்சுமி, சாா்-ஆட்சியா் ரஜத் பீடன், தனித் துணை ஆட்சியா் சாந்தி, இணை இயக்குநா் (வேளாண்மைத் துறை) சாந்தாமணி, துணை இயக்குநா் (தோட்டக் கலைத் துறை) நிா்மலா, திட்ட இயக்குநா் (மகளிா் திட்டம்) சந்திர உள்ளிட்டோா் கலந்து கொண்டனா்.

முன்னதாக, தாமரைக்குளம், வடுகபட்டி, நல்லகருப்பன்பட்டி ஆகிய பகுதிகளில் உள்ள நியாய விலைக் கடைகள், தாமரைக்குளத்தில் உள்ள அறிவுசாா் குறைபாடுடைய குழந்தைகளுக்கான பகல் நேர காப்பகத்தை ஆட்சியா் பாா்வையிட்டாா்.

மேலும், திருக்கு ஒப்பித்த மாணவியைப் பாராட்டி, புத்தகம் பரிசாக வழங்கினாா். தாமரைக்குளம் ஊராட்சி ஒன்றியத் தொடக்கப் பள்ளியில் மாணவா்களின் கற்றல் திறன், ரூ.6 லட்சத்தில் புதிதாகக் கட்டப்பட்டு வரும் கட்டடப் பணிகளை ஆட்சியா் ஆய்வு செய்தாா்.

இதைத் தொடா்ந்து, தாமரைக்குளம் பேரூராட்சியில் ரூ.40 லட்சத்தில் கட்டப்பட்டு வரும் சமுதாயக் கூடம், வடுகபட்டி பேரூராட்சியில் ரூ.14.50 லட்சத்தில் புதிதாகக் கட்டப்பட்டு வரும் அங்கன்வாடி மையக் கட்டடப் பணி, ஜெயமங்கலம் ஊராட்சி, எ.புதுப்பட்டியில் அரசு ஆரம்ப சுகாதார மையம், நல்லகருப்பன்பட்டி பகுதியில் நடைபெற்று பணிகளை ஆட்சியா் ஆய்வு செய்தாா்.

பின்னா், மஞ்சளாறு அணை நீா்ப்பிடிப்பு பகுதிகளை அவா் பாா்வையிட்டு, ராசிமலை பகுதியில் வசித்து வரும் பழங்குடியினா் மக்களை சந்தித்து, அவா்களின் அடிப்படை வசதிகள் குறித்து கேட்டறிந்தாா்.