உண்ணிக் காய்ச்சல் பாதித்த 12 போ் நலமுடன் உள்ளனா்: கடலூா் மாவட்ட சுகாதார அலுவலா்

கடலூா் மாவட்டத்தில் உண்ணிக் காய்ச்சலால் (ஸ்க்ரப் டைபஸ்) பாதிக்கப்பட்ட 12 போ் நலமுடன் இருப்பதாக மாவட்ட சுகாதார அலுவலா் எஸ்.பொற்கொடி தெரிவித்தாா்.

கடலூா் மாவட்டத்தில் உண்ணிக் காய்ச்சலால் (ஸ்க்ரப் டைபஸ்) சிலா் பாதிக்கப்பட்டுள்ளதாக தகவல் வெளியான நிலையில், இதுகுறித்து மாவட்ட சுகாதார அலுவலா் எஸ்.பொற்கொடி செவ்வாய்க்கிழமை கூறியதாவது:

உண்ணிக் காய்ச்சல் (ஸ்க்ரப் டைபஸ்) என்பது ஒரு வகை பாக்டீரியா தொற்று. இந்த நோயை பரப்பும் பூச்சியானது புதா் மண்டிய பகுதிகளிலும், அதிகமான செடி, கொடிகள் நிறைந்த பகுதிகளிலும் காணப்படும். இதனால், புதா் நிறைந்த பகுதிகளில் வசிக்கும் நபா்கள், காட்டுப் பகுதிகளில் வேலையில் ஈடுபடும் நபா்களுக்கு இந்த நோய் பாதிப்பு ஏற்பட வாய்ப்பு அதிகம் உள்ளது. மேலும், வீட்டில் வளா்க்கும் செல்லப்பிராணிகளுக்கு நோய் பாதிப்பு ஏற்பட்டாலும் கூட மனிதா்களுக்கு பரவ வாய்ப்புள்ளது. இந்த காய்ச்சலானது அக்டோபா் முதல் ஜனவரி மாதம் வரை அதிகமாக காணப்படும்.

இந்த நோய் பாதித்தவா்களுக்கு காய்ச்சல், உடல் சோா்வு, தலைவலி மற்றும் உடலில் எங்காவது கருப்பு புண் போன்ற அறிகுறிகள் தென்படும். இதற்கான சிகிச்சை அனைத்து அரசு ஆரம்ப சுகாதார நிலையங்கள், அரசு மருத்துவமனைகளிலும் அளிக்கப்படுகிறது. சிகிச்சைக்கான போதுமான மருந்துகள் இருப்பில் உள்ளது.

கடலூா் மாவட்டத்தில் கடந்த ஆண்டு 594 போ் ஸ்க்ரப் டைபஸ் காய்ச்சலால் பாதிக்கப்பட்டு சிகிச்சையால் குணமடைந்தனா். தற்போது, 12 பேருக்கு காய்ச்சல் கண்டறியப்பட்டுள்ள நிலையில், அவா்களும் சிகிச்சை பெற்று நலமுடன் உள்ளனா். நோய் பாதித்தவா்கள் வசிக்கும் இடங்களில் கிருமி நாசினி மூலம் சுத்தம் செய்தல் உள்ளிட்டவை மூலம் காய்ச்சலை கட்டுப்படுத்தலாம் என்றாா்.