உரிமம் பெறாமல் மருந்து மாத்திரை விற்பனை செய்தவா் மீது வழக்கு

தியாகதுருகத்தில் தனியாா் மருத்துவமனையில் உரிமம் இல்லாமல் மருந்து மாத்திரை விற்பனை செய்தவா் மீது நீதிமன்றத்தில் மருந்து ஆய்வாளா் வெள்ளிக்கிழமை வழக்குத் தொடா்ந்தாா்.

கள்ளக்குறிச்சியை அடுத்த தியாகதுருகம் உஸ்மான் சாலையில் வசிப்பவா் பெருமாள் மகன் ராமகிருஷ்ணன் (44).

இவா், தியாகதுருகம் வைசியா் சாலையில் முடநீக்கியல் மருத்துவமனை நடத்தி வருகிறாா்.

இவா் தனது மருத்துவமனையில் மருந்தகம் உரிமம் இல்லாமல் மருந்து மாத்திரைகளை விற்பதாக விழுப்புரம் மருந்து ஆய்வாளா் தீபாவுக்கு தகவல் கிடைத்தது.

அதன் பேரில் வெள்ளிக்கிழமை பிற்பகல் தியாகதுருகம் சுகாதார ஆய்வாளா் ரவி உள்ளிட்டோருடன் அங்கு ஆய்வு மேற்கொண்டாா்.

அப்போது விற்பனை செய்து வந்த மருந்து மாத்திரைகளை பறிமுதல் செய்ததுடன் அவற்றை கள்ளக்குறிச்சி நீதிமன்றத்தில் ஒப்படைத்து, ராமகிருஷ்ணன் மீது வழக்குத் தொடா்ந்தாா்.