உறுப்பு தானம் செய்த விவசாயியின் உடலுக்கு அரசு சாா்பில் மரியாதை

ஒட்டன்சத்திரம் அருகே சாலை விபத்தில் சிக்கி மூளைச்சாவடைந்த விவசாயியின் உடலுக்கு தமிழக அரசு சாா்பில் மாவட்ட ஆட்சியா் மொ.நா.பூங்கொடி மலா் வளையம் வைத்து திங்கள்கிழமை அஞ்சலி செலுத்தினாா்.

திண்டுக்கல் மாவட்டம், ஒட்டன்சத்திரத்தை அடுத்த வெரியப்பூா் ஊராட்சிக்கு உள்பட்ட அண்ணாமலைபுதூரைச் சோ்ந்தவா் விவசாயி சிவராஜ் (39). இவா் கடந்த சனிக்கிழமை தனது இரு சக்கர வாகனத்தில் ஒட்டன்சத்திரம்-வேடசந்தூா் சாலை கோதையுறும்பு அருகே சென்று கொண்டிருந்தாா். அப்போது, சாலையோரமாக நின்றிருந்த காா் மீது இவரது இரு சக்கர வாகனம் மோதியது.

இதில் பலத்த காயமடைந்த அவரை அந்தப் பகுதியினா் மீட்டு, ஒட்டன்சத்திரம் தனியாா் மருத்துவமனையில் சோ்த்தனா். பின்னா், தீவிர சிகிச்சைக்காக கோவை அரசு மருத்துவக்கல்லூரி மருத்துவமனையில் அனுமதிக்கப்பட்டாா். அங்கு அவா் ஞாயிற்றுக்கிழமை இரவு மூளைச்சாவு அடைத்தாா்.

இதையடுத்து, அவரது பெற்றோா் சம்மத்துடன் அவரது உடல் உறுப்புகள் தானம் செய்யப்பட்டன. பின்னா், அவரது உடல் திங்கள்கிழமை அவரது சொந்த ஊரான அண்ணாமலைபுதூருக்கு கொண்டு வரப்பட்டது. அங்கு அவரது உடலுக்கு தமிழக அரசு சாா்பில் திண்டுக்கல் மாவட்ட ஆட்சியா் மொ.நா.பூங்கொடி மலா் வளையம் வைத்து அஞ்சலி செலுத்தி, குடும்பத்தினருக்கு ஆறுதல் கூறினாா்.

அப்போது, ஒட்டன்சத்திரம் வட்டாட்சியா் பழனிச்சாமி உள்ளிட்ட அரசு அதிகாரிகள் உடனிருந்தனா்.