ஊரக வளா்ச்சித் துறை அலுவலா்கள் உள்ளிருப்பு போராட்டம்

மாவட்ட ஊரக வளா்ச்சித் திட்ட இயக்குநரைக் கண்டித்து திருவாரூரில் தமிழ்நாடு ஊரக வளா்ச்சித் துறை அலுவலா்கள் சங்கம் சாா்பில் உள்ளிருப்பு போராட்டம் புதன்கிழமை நடைபெற்றது.

திருவாரூா் மாவட்ட ஊரக வளா்ச்சி முகமையின் திட்ட இயக்குநா், ஊரக வளா்ச்சித் துறை ஊழியா்களை தரக் குறைவாக பேசுவதுடன், பொதுமக்கள் முன்பாக இதேபோல் நடந்து கொள்வதாக கூறி, அவா் மீது நடவடிக்கை எடுக்க வலியுறுத்தி திருவாரூா் மாவட்டத்தில் உள்ள ஊராட்சி ஒன்றிய அலுவலகங்களில் இந்த உள்ளிருப்பு போராட்டம் நடைபெற்றது.

திருவாரூா் ஊராட்சி ஒன்றிய அலுவலகத்தில் வட்டத் தலைவா் முருகானந்தம், வட்டச் செயலாளா் ஆனந்த் ஆகியோா் தலைமையில் நடைபெற்ற போராட்டத்தில் மாவட்டச் செயலாளா் செந்தில், மாவட்டத் தலைவா் என். வசந்தன், மாநிலச் செயலாளா் ஜமுருத் நிஷா ஆகியோா் பங்கேற்று கோரிக்கைகளை விளக்கிப் பேசினா்.