`தன் கண்ணை தானே குத்திக்கொள்கிறார் ட்ரம்ப்!' - அமெரிக்காவில் பரஸ்பர வரியின் விளை...
ஏற்காட்டில் ஏப்ரல், மே ஆகிய இரண்டு மாதங்களுக்கு சுற்றுலாப் பயணிகள் கேம்ப் ஃபயா் நடத்த தடை விதிக்கப்பட்டுள்ளது.
கோடை காலத்தில் வனப் பகுதியில் தீ விபத்து நிகழாதவாறு மேற்கொள்ள வேண்டிய முன்னெச்சரிக்கை நடவடிக்கைகள் குறித்து ஏற்காட்டில் வனத் துறை, காவல் துறை, வருவாய் துறை, தீயணைப்பு மீட்புப் பணிகள் துறை அலுவலா்களுடனான ஆலோசனைக் கூட்டம் மாவட்ட ஆட்சியா் ரா.பிருந்தாதேவி தலைமையில் செவ்வாய்க்கிழமை நடைபெற்றது.
கூட்டத்துக்குப் பிறகு செய்தியாளா்களிடம் ஆட்சியா் கூறியதாவது: கோடை காலம் தொடங்கியுள்ளதால் சேலம் மாவட்டத்தில் ஏற்காடு உள்ளிட்ட மலைப் பகுதிகளில் தீ விபத்து ஏற்படாத வகையில் மேற்கொள்ளப்பட வேண்டிய முன்னெச்சரிக்கை நடவடிக்கைகள் குறித்து தொடா்புடைய துறை அலுவலா்களுடனான ஆலோசனைக் கூட்டம் நடத்தப்பட்டது.
கடந்த ஆண்டுகளில் ஏற்பட்ட நிகழ்வுகளின் அடிப்படையில் சேலம், ஆத்தூா் வனக் கோட்டப் பகுதிகளில் முன்னேற்பாடு தீத் தடுப்பு கோடுகள் ஏற்படுத்தப்பட்டுள்ளன. தீத் தடுப்பு நடவடிக்கைகள் குறித்து வாட்ஸ்அப் குழு தொடங்கப்பட்டு கண்காணிக்கப்பட்டு வருகிறது.
மேலும், அடா் வனப் பகுதிகளில் வனத் தீ ஏற்படாதவாறு கண்காணிக்கும் வகையில் சேலம் வனக் கோட்டத்துக்கு 4 ட்ரோன் கேமராக்கள் மற்றும் ஆத்தூா் வனக் கோட்டத்துக்கு ஒரு ட்ரோன் கேமரா என 5 ட்ரோன் கேமராக்கள் வழங்கப்பட்டுள்ளன.
மேலும், கேம்ப் ஃபயா்-க்கு ஏப்ரல், மே ஆகிய இரண்டு மாதங்களுக்கு ஏற்காட்டில் தடை விதிக்கப்படுகிறது. ஏற்காடு, கருமந்துறை போன்ற மலைப்பகுதிகளுக்கு வரும் சுற்றுலாப் பயணிகள் எளிதில் தீப்பற்றக்கூடிய பொருள்களை வனப்பகுதிகளுக்கு எடுத்துச் செல்லாமல் இருப்பதை வனத் துறையினா் உறுதி செய்ய வேண்டும்.
ஏற்காடு, கருமந்துறை ஆகிய இரண்டு மலைப் பகுதிகளில் உள்ள தீயணைப்பு நிலையங்களை ஏற்காடு - 73050 95785, கருமந்துறை - 04292 244803, 75503 96101 ஆகிய எண்களில் தொடா்பு கொள்ளலாம். மேலும், காட்டுத் தீ தொடா்பான தகவல்களை 0427 2415097 என்ற தொலைபேசி எண்ணிலோ அல்லது 1800 599 0427 என்ற கட்டணமில்லா சேவை எண்ணிலோ அல்லது மாவட்ட ஆட்சியா் அலுவலக கட்டுப்பாட்டு அறையை 1077 என்ற கட்டணமில்லா தொலைபேசி எண்ணிலோ தொடா்பு கொண்டு தகவல் தெரிவிக்கலாம் என்றாா்.
கூட்டத்தில் சேலம் மாநகராட்சி ஆணையா் இளங்கோவன், உதவி வனப் பாதுகாவலா் (பயிற்சி) கே. கீா்த்தனா, துணை ஆட்சியா் (பயிற்சி) திருமதி ஆா். மாருதி பிரியா உள்ளிட்ட அரசு அலுவலா்கள் கலந்து கொண்டனா்.
