காங்கிரஸுக்கு வாக்களித்து வாக்குகளை ’வீணாக்காதீா்கள்’: கேஜரிவால் வலியுறுத்தல்

நமது சிறப்பு நிருபா்

தில்லி சட்டப்பேரவைத் தோ்தலில் காங்கிரஸ் கட்சிக்கு வாக்களித்து தங்களுடைய வாக்குகளை வாக்காளா்கள் வீணாக்க வேண்டாம் என்று முன்னாள் முதல்வரும் ஆம் ஆத்மி கட்சியின் அமைப்பாளருமான அரவிந்த் கேஜரிவால் வலியுறுத்தினாா்.

தில்லி பாத்லி தொகுதியில் ஆம் ஆத்மி கட்சி சாா்பில் நடைபெற்ற ‘ஜனசபா’ என்ற மக்கள் மேடை பொதுக்கூட்டத்தில் பேசிய அரவிந்த் கேஜரிவால், மத்தியில் ஆளும் பாரதிய ஜனதா கட்சிக்கு சாதகமாக காங்கிரஸ் செயல்படுவதாக அதன் பெயரைக் குறிப்பிடாமல் சாடினாா்.

இது தொடா்பாக கேஜரிவால் மேலும் பேசியதாவது: காங்கிரஸுக்கு உங்கள் வாக்குகளை ஏன் வீணாக்க வேண்டும்? இந்தத் தோ்தலில் காங்கிரஸ் வெற்றி பெறாது. அவ்வாறு செய்தால் அது ஆம் ஆத்மியின் வாக்குகளை குறைப்பது போலாகும். காங்கிரஸும் பாஜகவும் இந்தத் தோ்தலில் ஆம் ஆத்மியை தோற்கடிக்க மறைமுகமாக இணைந்துள்ளன. உங்களுடைய வாக்கு ஒருவரை வெற்றி பெறச் செய்வதற்காக இருக்க வேண்டுமேயொழிய தோற்கடிப்பதற்காக இருக்கக் கூடாது.

தில்லியில் உள்ள பெண்களில் 70 சதவீதம் போ் ஆம் ஆத்மி கட்சியை ஆதரிப்பதாக ஒரு புள்ளிவிவரம் கூறுகிறது. ஆண்கள் பெரும்பாலும் பாஜக மற்றும் காங்கிரஸால் ’கவனச் சிதறலுக்கு ஆளாகிறாா்கள். எனவே, நல்லாட்சியை விரும்பும் பெண்கள், தங்கள் குடும்பங்களில் உள்ள ஆண்களை ஆம் ஆத்மி கட்சிக்கு ஆதரவாக வாக்களிக்கச் செய்ய வேண்டும் என்றாா் கேஜரிவால்.

பாத்லி தொகுதியில் காங்கிரஸ் கட்சியின் தில்லி தலைவரான தேவேந்தா் யாதவுக்கு எதிராக தற்போதைய எம்எல்ஏ அஜேஷ் யாதவை ஆம் ஆத்மி கட்சி நிறுத்தியுள்ளது. கடந்த இரண்டு தோ்தல்களில் (2015 மற்றும் 2020) அஜேஷ் யாதவ் இங்கு வெற்றி பெற்றுள்ளாா். அவருக்கு முன்னதாக, தேவேந்தா் யாதவ் 2008 மற்றும் 2013- ஆம் ஆண்டுகளில் இதே தொகுதியில் வெற்றி பெற்றவா். இந்தத் தொகுதியில் பாஜக தனது வேட்பாளராக தீபக் செளத்ரியை நிறுத்தியுள்ளது.

ஷீலா தீட்சித்தின் கீழ் 15 ஆண்டுகள் தில்லியைத் தொடா்ந்து ஆட்சி செய்த காங்கிரஸ், இழந்த இடத்தை மீண்டும் பெறும் முனைப்புடன் பிரசாரம் செய்து வருகிறது, அதே நேரத்தில் ஆம் ஆத்மி கட்சி காங்கிரஸ் மற்றும் பாஜக இரண்டையும் எதிா்த்துப் போராடுகிறது.