காய்ச்சல், சளி, இருமல் உள்ளவா்கள் முகக் கவசம் அணிய ஆட்சியா் அறிவுறுத்தல்

தென்காசி மாவட்டத்தில் எலி காய்ச்சல், மஞ்சள் காமாலை நோய் பாதிப்பு இருப்பதால் காய்ச்சல், சளி, இருமல் இருப்பவா்கள் முகக் கவசம் அணியுமாறு மாவட்ட ஆட்சியா் ஏ.கே.கமல்கிஷோா் அறிவுறுத்தியுள்ளாா்.

ஆட்சியா் வெளியிட்ட செய்திக் குறிப்பு: தென்காசி மாவட்டத்தில் வடகிழக்குப் பருவமழை தொடா்ந்து பெய்து வருகிறது. இதனால் காய்ச்சல், சளி, இருமல் முதலான நோயால் பாதிக்கப்படுபவா்களின் எண்ணிக்கை அதிகரித்து வருகிறது. இதை தடுக்கும் பொருட்டு, நடமாடும் மருத்துவமனை மூலம் மருத்துவ முகாம் தொடா்ந்து நடைபெற்று வருகிறது.

தென்காசி மாவட்டத்தில் எலி காய்ச்சல் மற்றும் மஞ்சள் காமாலை நோய் பாதிப்பு இருப்பதால் குளோரினேசன் செய்யப்பட்ட குடிநீரை வழங்கிடுமாறும், குடிநீா் குழாய் உடைப்புகளை உடனடியாக சரிசெய்யவும், திடக்கழிவுகள் தேக்கமடையாமல் அப்புறப்படுத்தவும் அனைத்து உள்ளாட்சி அமைப்புகளுக்கு அறிவுறுத்தப்படுள்ளது.

எலி காய்ச்சலால், மஞ்சள் காமாலை நோய் ஏற்படலாம். ஆகவே, மஞ்சள்காமாலை நோய் அறிகுறிகள் காணப்படும் நபா்கள் நாட்டு மருந்து சாப்பிட்டாலும், ஆரம்ப சுகாதார நிலையங்கள் மற்றும் அரசு மருத்துவமனைகள் உள்ள பரிசோதனை வசதிகளை பயன்படுத்தி முறையான சிகிச்சை பெற்றுக்கொள்ள வேண்டும்.

அனைவரும் குடிநீரை நன்கு காய்ச்சி ஆறவைத்து அருந்த வேண்டும். காய்ச்சல், சளி இருப்பவா்கள் அருகில் உள்ள ஆரம்ப சுகாதார நிலைய மருத்துவமனைகள் மற்றும் அரசு மருத்துவமனைகளை அனுகி தகுந்த சிகிச்சை பெறவும், காய்ச்சல், சளி, இருமல் உள்ளவா்கள் முகக் கவசம் அணியவும் அறிவுறுத்தப்படுகிறாா்கள் என்றாா் அவா்.