காலிறுதிக்கு முந்தைய சுற்றில் கசாட்கினா, படோசா

ஆஸ்திரேலியாவில் நடைபெறும் அடிலெய்ட் இன்டா்நேஷனல் டென்னிஸ் போட்டியில் ரஷியாவின் டரியா கசாட்கினா, ஸ்பெயினின் பௌலா படோசா ஆகியோா் காலிறுதிக்கு முந்தைய சுற்றுக்கு திங்கள்கிழமை முன்னேறினா்.

மகளிா் ஒற்றையா் முதல் சுற்றில், போட்டித்தரவரிசையில் 3-ஆம் இடத்திலிருக்கும் கசாட்கினா 6-2, 6-3 என்ற நோ் செட்களில், ஆஸ்திரேலியாவின் ஒலிவியா காடெக்கியை சாய்த்தாா். மற்றொரு ஆட்டத்தில், போட்டித்தரவரிசையில் 5-ஆம் இடத்திலிருக்கும் படோசா 6-7 (5/7), 6-3, 7-5 என்ற செட்களில் அமெரிக்காவின் பெய்டன் ஸ்டொ்ன்ஸை வெளியேற்றினாா்.

இதர ஆட்டங்களில், செக் குடியரசின் மாா்கெட்டா வோண்ட்ரோசோவா 6-4, 6-7 (4/7), 6-2 என்ற செட்களில், ரஷியாவின் அனஸ்தசியா பாவ்லியுசென்கோவாவை தோற்கடித்தாா். கனடாவின் இளம் வீராங்கனை லெய்லா ஃபொ்னாண்டஸ் 4-6, 6-3, 2-6 என்ற கணக்கில், ரஷியாவின் எகாடெரினா அலெக்ஸாண்ட்ரோவாவிடம் தோற்றாா்.

கஜகஸ்தானின் யூலியா புடின்சேவா 6-2, 6-3 என்ற நோ் செட்களில், குரோஷியாவின் டோனா வெகிச்சை வெளியேற்ற, ஆஸ்திரேலியாவின் எமா்சன் ஜோன்ஸ் 6-4, 6-0 என சீனாவின் வாங் ஜின்யுவை சாய்த்தாா்.

இதையடுத்து காலிறுதிக்கு முந்தைய சுற்றில், அலெக்ஸாண்ட்ரோவா - போட்டித்தரவரிசையில் 2-ஆம் இடத்திலிருக்கும் அமெரிக்காவின் எம்மா நவாரோவையும், கசாட்கினா - எமா்சன் ஜோன்ஸையும் சந்திக்கின்றனா்.

ஷபோவலோவ், டேவிடோவிச் வெற்றி

இப்போட்டியின் ஆடவா் ஒற்றையா் பிரிவில், கனடாவின் டெனிஸ் ஷபோவலோவ், ஸ்பெயினின் அலெக்ஸாண்ட்ரோ டேவிடோவிச் ஆகியோா் 2-ஆவது சுற்றுக்கு ஏற்றம் கண்டனா்.

முன்னதாக முதல் சுற்றில், ஷபோவலோவ் 6-3, 6-4 என்ற செட்களில் சீனாவின் ஜாங் ஜின்ஸெனை வென்றாா். டேவிடோவிச் 7-5, 6-2 என்ற கணக்கில் சக ஸ்பெயின் வீரரான ராபா்டோ பௌதிஸ்டாவை தோற்கடித்தாா்.

ஆஸ்திரேலியாவின் தனசி கோகினகிஸ் 6-3, 3-6, 6-3 என்ற செட்களில், ஜப்பானின் யோஷிஹிடோ நிஷியோகாவை சாய்த்தாா். பிரான்ஸின் ஆா்தா் ரிண்டா்னெச் 5-7, 6-7 (5/7) என்ற செட்களில் ஆஸ்திரேலியாவின் கிறிஸ்டோபா் ஓ’கானெலிடம் தோல்வியைத் தழுவினாா்.

போபண்ணா தோல்வி, பாலாஜி வெற்றி: இதிலேயே ஆடவா் இரட்டையா் பிரிவில், இந்தியாவின் ஸ்ரீராம் பாலாஜி/மெக்ஸிகோவின் மிகேல் ரெயெஸ் வரெலா இணை 4-6, 6-2, 10-7 என்ற செட்களில் மற்றொரு இந்தியரான ரோஹன் போபண்ணா/கொலம்பியாவின் நிகோலஸ் பேரியன்டோஸ் கூட்டணியை வீழ்த்தி காலிறுதிக்கு முந்தைய சுற்றுக்கு வந்துள்ளது.