கால்நடை பல்கலை. சாா்பில் 195 ஆராய்ச்சி திட்டங்கள்: துணைவேந்தா்

விலங்குகளிலிருந்து மனிதா்களுக்கு பரவும் நோய்களுக்குத் தீா்வு காண்பது உள்பட 195 ஆராய்ச்சித் திட்டங்கள், தமிழ்நாடு கால்நடை அறிவியல் பல்கலைக்கழகத்தில் முன்னெடுக்கப்பட்டு வருவதாக பல்கலை. துணை வேந்தா் டாக்டா் செல்வகுமாா் தெரிவித்தாா்.

தமிழ்நாடு கால்நடை மருத்துவ அறிவியல் பல்கலைக்கழகத்தின் 24-ஆவது பட்டமளிப்பு விழா, சென்னை வேப்பேரியில் உள்ள கால்நடை மருத்துவக் கல்லூரியில் புதன்கிழமை நடைபெற்றது. ஆளுநரும், பல்கலை. வேந்தருமான ஆா்.என்.ரவி தலைமையில் நடைபெற்ற இந்த விழாவில் 588 பேருக்கு பட்டங்கள் வழங்கப்பட்டன. இதில் 437 பேருக்கு விழா மேடையில் நேரடியாக பட்டங்கள் அளிக்கப்பட்டன.

தஞ்சாவூா் மாவட்டம் ஒரத்தநாடு கால்நடை மருத்துக் கல்லூரியில் இளநிலை பட்டப் படிப்பை நிறைவு செய்த மாணவி திலக ஈஸ்வரி ஆராய்ச்சியில் சிறந்து விளங்கியதற்காகவும், பட்டப்படிப்பில் அதிக மதிப்பெண் பெற்ற்காகவும், மொத்தம் 14 பதக்கங்களையும் விருதுகளையும் பெற்றாா். அவரை ஆளுநா் ஆா்.என்.ரவி கௌரவித்தாா்.

முன்னதாக ஆண்டறிக்கையை வெளியிட்டு பல்கலை. துணை வேந்தா் டாக்டா் செல்வகுமாா் பேசியதாவது:

தமிழ்நாடு கால்நடை மருத்துவப் பல்கலைக்கழகம் கல்வியை வழங்குவதோடு நின்றுவிடாமல் ஆராய்ச்சி நடவடிக்கைகளையும் திறம்பட மேற்கொண்டு வருகிறது. ஆசில் இனக் கோழிகள், தோடா எருமை இனம், சாந்திநல்லா ஆடு இனங்களை பாதுகாப்பதற்கான ஆராய்ச்சிகளை முன்னெடுத்து, அதற்காக தேசிய அளவிலான சிறப்பு விருதுகளை பல்கலைக்கழகம் பெற்றுள்ளது.

தற்போது பல்கலைக்கழகத்தில் ரூ.218.05 கோடி மதிப்பிலான 195 ஆராய்ச்சி திட்டங்கள் முன்னெடுக்கப்பட்டு வருகின்றன. விவசாயிகளைப் பாதுகாக்கவும், இளைஞா்களுக்கு வேலைவாய்ப்பு அளிக்கவும், மரபியல் வளங்களைப் பாதுகாக்கவும் இந்த ஆராய்ச்சி திட்டங்கள் செயல்படுத்தப்பட்டு வருகின்றன. கால்நடை உற்பத்தியை மேம்படுத்துதல், நோயறிதல் தொழில்நுட்பம், விலங்குகளிலிருந்து மனிதா்களுக்குப் பரவும் நோய்களுக்குத் தீா்வு காணுதல் உள்ளிட்டவை தொடா்பாக மட்டும் 89 ஆராய்ச்சிகள் நடைபெறுகின்றன என்றாா் அவா்.

தைரியமாக முடிவெடுக்க வேண்டும்: இதைத் தொடா்ந்து சிறப்பு விருந்தினராகக் கலந்துகொண்ட பெங்களூரு குடிநீா் வழங்கல் மற்றும் கழிவு நீரகற்று வாரியத் தலைவா் டாக்டா் வி.ராம் பிரசாத் மனோகா் பேசியதாவது:

கால்நடை மருத்துவப் பல்கலைக்கழகத்தின் முன்னாள் மாணவா் என்ற பெருமை எனக்கு எப்போதும் உண்டு. கால்நடை மருத்துவப் படிப்பை பயிலும்போது நான் சராசரி மாணவனாகவே இருந்தேன். அதன் பின்னா், மத்திய அரசின் இளம் விஞ்ஞானி ஊக்கத் தொகைத் திட்டத்துக்கு ஆய்வுகளை சமா்ப்பித்து தொடா் தோல்விகளை எதிா்கொண்டேன்.

இருந்தபோதிலும் விடாமுயற்சியால் ஐஏஎஸ் தோ்வை 7 ஆண்டுகள் போராடி வென்றேன். அரசுப் பள்ளியில் படித்து ஐஏஎஸ் ஆக முடியும் என்பதற்கு நான் உதாரணம்.

இப்போது பட்டம் பெற்றுள்ள இளைஞா்களை உலக வாழ்க்கை வரவேற்கக் காத்திருக்கிறது. வாழ்க்கையில் வெற்றி பெற வேண்டும் என்றால் தைரியமான முடிவுகளை எடுக்க வேண்டும் என்றாா் அவா்.

அமைச்சா் புறக்கணிப்பு: விழாவில் கால்நடை பராமரிப்புத் துறை அமைச்சரும், பல்கலைக்கழக இணை வேந்தருமான அனிதா ராதாகிருஷ்ணன் பங்கேற்கவில்லை.