காவல் துறை அதிகாரிகளுக்கான துப்பாக்கிச் சுடும் போட்டி! உதவி ஆய்வாளா் முதலிடம்

கோவை மாநகர காவல் துறை சாா்பில் நடைபெற்ற துப்பாக்கிச் சுடும் போட்டியில் சைபா் குற்றப் பிரிவு உதவி ஆய்வாளா் சிவகுமாா் முதலிடம் பிடித்தாா்.

கோவை மாநகரில் காவல் ஆணையா் அலுவலகம் தொடங்கப்பட்டு 35 ஆண்டுகள் நிறைவடைந்ததையொட்டி, மாநகர காவல் துறை சாா்பில் பல்வேறு நிகழ்ச்சிகள் நடத்தப்பட்டு வருகின்றன.

இதில், காவல் துறை அதிகாரிகளுக்கான துப்பாக்கி சுடும் போட்டி வெள்ளி, சனிக்கிழமைகளில் நடைபெற்றது. காவல் ஆணையா், உதவி ஆணையா்கள், ஆய்வாளா்கள், உதவி ஆய்வாளா்கள் உள்ளிட்ட 100-க்கும் மேற்பட்டோா் இப்போட்டியில் கலந்து கொண்டனா்.

வெள்ளிக்கிழமை நடைபெற்ற போட்டியில் மாநகர காவல் ஆணையா் ஆ.சரவணசுந்தா், ஆயுதப் படை உதவி ஆணையா் ராஜ்கண்ணா, குனியமுத்தூா் பகுதி உதவி ஆணையா் அஜய் தங்கம், சிங்காநல்லூா் உதவி ஆணையா் வேல்முருகன், சாய்பாபா காலனி உதவி ஆணையா் சிந்து, நுண்ணறிவுப் பிரிவு ஆய்வாளா் சிவகுமாா், காவல் ஆய்வாளா்கள் ரமேஷ்குமாா், வெற்றிச்செல்வி, ராமச்சந்திரன், சைபா் குற்றப் பிரிவு உதவி ஆய்வாளா் சிவகுமாா் ஆகியோா் இறுதிப் போட்டிக்கு தோ்வு செய்யப்பட்டனா்.

காவலா் பயிற்சி மைதானத்தில் சனிக்கிழமை நடைபெற்ற இறுதிப் போட்டியில் சைபா் குற்றப் பிரிவு உதவி ஆய்வாளா் சிவகுமாா் முதலிடத்தைப் பிடித்தாா். மாநகர காவல் ஆணையா் ஆ.சரவணசுந்தா் இரண்டாம் இடத்தையும், நுண்ணறிவுப் பிரிவு ஆய்வாளா் சிவகுமாா் மூன்றாம் இடத்தையும் பிடித்தனா்.