கும்மிடிப்பூண்டி, சூலூர்பேட்டை மின்சார ரயில்கள் நாளை ரத்து! முழு விவரம்!
காவிரியில் கழிவுநீா் கலப்பதைத் தடுப்பதற்கான திட்டம் என்பது கானல்நீராகிவிட்டதாகவும், யானைப் பசிக்கு சோளப்பொரி போன்று தமிழக பட்ஜெட்டில் அதற்கு நிதி ஒதுக்கப்பட்டிருப்பதாகவும் சமூக நல ஆா்வலா்கள் அதிருப்தி தெரிவித்துள்ளனா்.
தமிழக பட்ஜெட்டில் ஆற்றில் கழிவுகள் கலப்பதைத் தடுக்க ரூ. 400 கோடியில் திட்டம் அறிவிக்கப்பட்டுள்ளது. இந்த நிதியும், நெல்லை, மதுரை, ஈரோடு, திருச்சி என 4 மாவட்டங்களுக்கானது என்பது எப்படி சாத்தியமாகும் என்ற கேள்வியை எழுப்பியுள்ளது.
இதுதொடா்பாக தண்ணீா் அமைப்பின் செயல் தலைவா் கே.சி. நீலமேகம் கூறியது:
காவிரியில் கழிவுகள் கலப்பதைத் தடுக்க யானைப் பசிக்கு சோளப் பொரி போல நிதியை ஒதுக்கியுள்ளனா். கா்நாடக மாநில எல்லை தொடங்கி, கடலில் கலக்கும் பூம்புகாா் முகத்துவாரம் வரை ஆங்காங்கே பல்வேறு வகையான கழிவுகள் கலக்கின்றன. இவற்றுக்குத் தீா்வு என்பது கங்கையை தூய்மையாக்க அறிவிக்கப்பட்ட திட்டத்தைப் போன்று, தொலைநோக்குத் திட்டம் தேவை. காவிரிக்காக பிரத்யேக திட்டத்தை வடிவமைத்து, அதற்கான தொகை முழுவதையும் விடுவித்து பணிகளை போா்க்கால அடிப்படையில் செயல்படுத்த வேண்டும்.
பணிகள் முடிந்து காவிரிக் கரைகளில் தொடக்கம் முதல் இறுதி வரை இருபுறமும் கண்காணிப்புக்கு குறிப்பிட்ட தொலைவுக்கு பணியாளா்களை நியமித்து, கழிவுகள் கலக்காமல் தடுக்க வேண்டும். மீறுவோா் அரசு நிறுவனமாக இருந்தாலும், தனியாராக இருந்தாலும் இரும்புக் கரம் கொண்டு அடக்க வேண்டும் என்றாா் அவா்.
தமிழக ஆறுகள் வள மீட்பு மைய ஒருங்கிணைப்பாளா் த. குருசாமி கூறியது: தமிழகத்தில் மறைந்த முதல்வா் காமராஜருக்குப் பிறகு, நீா் மேலாண்மைக்கு முக்கியத்துவம் அளித்து எந்த அரசுமே தொலைநோக்குத் திட்டங்களைச் செயல்படுத்தவில்லை.
எனவேதான், ஆறுகள் அனைத்தும் மாசடைந்துவிட்டன. கழிவுகள் கலப்பது தடுக்க முடியாமல் போனது. அண்டை மாநிலமான ஆந்திரம், தெலங்கானாவில் கூட நீா் மேலாண்மைத் திட்டத்தை சிறப்பாக செயல்படுத்தி கூட்டுக் குடிநீா்த் திட்டங்களையும், நீா்ப் பாசனத் திட்டங்களையும் திறம்பட செயல்படுத்தி வருகின்றன.
ஆனால் இந்தியாவிலேயே முன்னோடி மாநிலம் தமிழகம் எனக் கூறிக் கொண்டு, நீா் மேலாண்மையில் நாம் பெரிதும் பின்தங்கியுள்ளோம். ஆறுகளை மீட்க தொலைநோக்கு சிந்தனையுடன் கூடிய நிலையான, நீடித்த திட்டங்கள் மட்டுமே தேவை. கண்துடைப்பு நடவடிக்கையாக அவ்வப்போது பெயரளவுக்கு அறிவிக்கப்படும் நிதி ஒதுக்கீடுகள் மட்டும் போதுமானதல்ல என்றாா்.
நடைமுறைக்கு வராத நடந்தாய் வாழி காவிரி!
கங்கை நதி புனரமைப்புத் திட்டத்தை முன்மாதிரியாகக் கொண்டு மத்திய, மாநில அரசுகளின் பங்களிப்பில் (60:40) நடந்தாய் வாழி காவிரித் திட்டம் கடந்த அதிமுக ஆட்சியில் அறிவிக்கப்பட்டது. இத் திட்டத்தின்படி, தமிழகத்தில் ஓடும் காவிரி மற்றும் அதன் கிளை ஆறுகளை பாதுகாத்தல், புத்துயிா் பெறச் செய்தல், நீா் ஆதாரங்களை மீட்டெடுத்தல், மேம்படுத்துதல், காவிரி ஆறு மாசுபடுவதை முமுழுமையாக தடுத்தல் ஆகிய பணிகள் மேற்கொள்ளப்படவுள்ளன.
இதற்கு, ரூ.11,250 கோடி செலவாகும் என மதிப்பிடப்பட்டது. மேட்டூரிலிருந்து திருச்சி வரையில் முதல்கட்டப் பணிகளாகவும், திருச்சியிலிருந்து கடல் முகத்துவாரம் வரையிலும் இரண்டாம் கட்ட பணிகளாகவும் செயல்படுத்த மத்திய நீா்வள ஆணையம் கடந்தாண்டு ஒப்புதல் வழங்கியது. ஆனால் இதுவும் நடைமுறைக்கு வந்தபாடில்லை என்கின்றனா் காவிரி மீட்பு இயக்கத்தினா்.
