காஷ்மீா் பாதுகாப்பு நிலவரம்: துணைநிலை ஆளுநா், ராணுவ தலைமை தளபதி ஆலோசனை

பஹல்காம் பயங்கரவாதத் தாக்குதலைத் தொடா்ந்து, ஜம்மு-காஷ்மீரின் பாதுகாப்பு நிலவரம் குறித்து ராணுவ தலைமைத் தளபதி உபேந்திர துவிவேதி உள்ளிட்ட உயரதிகாரிகளுடன் துணைநிலை ஆளுநா் மனோஜ் சின்ஹா வெள்ளிக்கிழமை ஆலோசனை மேற்கொண்டாா்.

அப்போது, ‘தாக்குதலில் ஈடுபட்ட பயங்கரவாதிகளும் சதிகாரா்களும் வேட்டையாடப்பட்டு, தங்களின் செயலுக்கு கடுமையான விலை கொடுக்கச் செய்யப்பட வேண்டும்’ என்று துணைநிலை ஆளுநா் வலியுறுத்தினாா்.

ஜம்மு-காஷ்மீரின் அனந்த்நாக் மாவட்டம், பஹல்காமில் சுற்றுலாப் பயணிகள் மீது பயங்கரவாதிகள் கடந்த செவ்வாய்க்கிழமை நடத்திய தாக்குதலில் 26 போ் உயிரிழந்தனா்.

ஒட்டுமொத்த நாட்டையும் உலுக்கியுள்ள இத்தாக்குதலைத் தொடா்ந்து, ஜம்மு-காஷ்மீரில் பாதுகாப்பு நிலவரம் குறித்து ஆய்வு செய்வதற்காக ராணுவ தலைமைத் தளபதி உபேந்திர துவிவேதி வெள்ளிக்கிழமை வந்தாா்.

ஸ்ரீநகரில் துணைநிலை ஆளுநா் மனோஜ் சின்ஹா தலைமையில் ராணுவ தலைமைத் தளபதி உபேந்திர துவிவேதி, துணை தலைமைத் தளபதி பிரதீக் சா்மா, வடக்கு மண்டல ராணுவ தளபதி சுசீந்திர குமாா், 15 காா்ப்ஸ் படைத் தளபதி பிரசாந்த் ஸ்ரீவாஸ்தவா உள்ளிட்டோா் பங்கேற்ற உயா்நிலை ஆலோசனைக் கூட்டம் நடைபெற்றது. சுமாா் 1 மணிநேரம் நடந்த இக்கூட்டத்தில் பஹல்காம் தாக்குதல் மற்றும் ஜம்மு-காஷ்மீரின் ஒட்டுமொத்த பாதுகாப்பு தொடா்புடைய விவகாரங்கள் விவாதிக்கப்பட்டன.

‘வேட்டையாடப்பட வேண்டும்’: அப்போது பேசிய மனோஜ் சின்ஹா, ‘பஹல்காம் தாக்குதலுக்கு காரணமானவா்களை நீதியின் முன் நிறுத்த உறுதியான நடவடிக்கைகளை மேற்கொள்வதோடு, பயங்கரவாதம் மற்றும் அதன் கட்டமைப்பை ஒழிக்கும் முயற்சிகளை தீவிரப்படுத்த வேண்டும். ராணுவம், மத்திய ஆயுதக் காவல் படை மற்றும் காவல்துறையினரின் வீரத்தின் மீது தேசம் முழு நம்பிக்கைக் கொண்டுள்ளது. பஹல்காம் தாக்குதலில் ஈடுபட்ட பயங்கரவாதிகள், சதித்திட்டம் தீட்டியவா்களை அடையாளம் கண்டு, அவா்களுக்கு முடிவுகட்டுவதில் அனைத்துப் படையினரும் ஒருங்கிணைப்புடன் செயலாற்ற வேண்டும். பயங்கரவாதிகளும் சதிகாரா்களும் எங்கிருந்தாலும், அவா்கள் வேட்டையாடப்பட வேண்டும். நமது குடிமக்களுக்கு எதிரான கோழைத்தனமான தாக்குதலுக்காக அவா்கள் கடுமையான விலையை கொடுக்க வேண்டும்’ என்றாா்.