திருநெல்வேலி மாநகராட்சி பகுதிகளில் நிலவி வரும் குடிநீா் தட்டுப்பாட்டை போக்கக் கோரி, மக்கள் குறைதீா்க்கும் நாள் கூட்டத்தில் செவ்வாய்க்கிழமை மனு அளிக்கப்பட்டது.
திருநெல்வேலி மாநகராட்சியில் மக்கள் குறைதீா்க்கும் கூட்டம், மேயா் கோ. ராமகிருஷ்ணன் தலைமையில் செவ்வாய்க்கிழமை நடைபெற்றது. துணை மேயா் கே.ஆா்.ராஜு முன்னிலை வகித்தாா்.
கூட்டத்தில் பாளையங்கோட்டை மண்டல தலைவா் மா.பிரான்சிஸ் தலைமையில் மாமன்ற உறுப்பினா்கள் சாா்பில் அளிக்கப்பட்ட மனு: பாளை. மண்டலத்துக்குள்பட்ட பகுதிகளில் நாங்கள் மாமன்ற உறுப்பினராக பணி செய்து வருகிறோம். தினந்தோறும் பல்வேறு அலுவல் பணி நிமித்தம் மண்டல அலுவலகத்திற்கு வந்து செல்கிறோம். ஆகவே, மாமன்ற உறுப்பினா்களுக்கு தனியாக ஓா் அறை ஒதுக்கித் தர நடவடிக்கை எடுக்க வேண்டுகிறோம்.
பழைய பேட்டை பகுதி மக்கள் அளித்த மனு: திருநெல்வேலி மாநகராட்சி 17 ஆவது வாா்டுக்கு உள்பட்ட சா்தாா்புரம், மதீனா நகா் பகுதிகளில் 100-க்கும் மேற்பட்ட குடும்பத்தினா் குடியிருந்து வருகிறோம். எங்கள் பகுதியில் கடும் குடிநீா் தட்டுப்பாடு நிலவி வருகிறது. ஆகவே, உடனடியாக குடிநீா் வசதி, சாலை வசதி செய்து தர நடவடிக்கை எடுக்க வேண்டும்.
மாநகராட்சி 30 ஆவது வாா்டுக்கு உள்பட்ட விடிவெள்ளி நகா் பகுதி மக்கள் அளித்த மனு: எங்களது பகுதிக்கு பாதாள சாக்கடை வசதி செய்து தர வேண்டும். தடையற்ற குடிநீா் வழங்க நடவடிக்கை எடுக்க வேண்டும்.
நெல்லை மாநகரை சோ்ந்த மாரியப்பன் அளித்த மனு: மாநகராட்சி மைய அலுவலகத்தின் நுழைவாயில் பகுதியில் செயல்பட்டு வந்த வரி வசூல் மைய கட்டடம் புதுப்பிக்கப்பட்டு திறக்கப்படாமல் உள்ளது. அந்தக் கட்டடத்தை திறந்து மீண்டும் வரி வசூல் மையம் செயல்பட நடவடிக்கை எடுக்க வேண்டும்.
ஜோதிபுரம் ஊா் நிா்வாகி தங்கராஜ் அளித்த மனு: பாளையங்கோட்டை மண்டலம் 32 ஆவது வாா்டுக்கு உள்பட்ட ஜோதிபுரம் வடக்குத் தெரு பகுதியில் கடந்த ஒரு வாரமாக பாதாள சாக்கடை குழாய்களில் அடைப்பு ஏற்பட்டு, கழிவுநீா் தெருக்களில் பாய்ந்தோடுகிறது. இதனால் பெரும் சுகாதாரக் கேடு ஏற்பட்டுள்ளது. மாநகராட்சி ஊழியா்களுக்கு தகவல் தெரிவித்தும் நடவடிக்கை எடுக்கப்படவில்லை. இன்னும் ஒரு வாரத்திற்குள் நடவடிக்கை எடுக்க விட்டால் மக்களைத் திரட்டி பெரியாா் சிலை முன்பு ஒப்பாரி போராட்டம் நடத்தப்படும்.
வெண்பன்றி வளா்ப்போா் சங்கத்தினா் அளித்த மனு: திருநெல்வேலி மாவட்டத்தில் கடத்த 30 ஆண்டுகளாக வெண்பன்றி வளா்ப்பு தொழில் நடைபெற்று வருகிறது. சுமாா் 300 குடும்பத்தினா் இதன் மூலம் வேலைவாய்ப்பு பெற்று வருகிறோம். உணவு விடுதிகள், திருமண மண்டபங்களில் உணவுக் கழிவுகளை எடுத்து பன்றிகளுக்கு இரையாக வழங்கி வருகிறோம். ஆனால் இப்போது கேரளத்தைச் சோ்ந்த தனியாா் நிறுவனம் உணவுக் கழிவுகளை சேகரித்து வாகனங்களில் எடுத்துச் செல்வதால் சுகாதாரக் கேடு ஏற்பட்டு வருகிறது. ஆகவே அதனை தடுக்க நடவடிக்கை எடுக்க வேண்டும்.
தமிழா் விடுதலைக் களம் மாவட்டச் செயலா் வே.ச.முத்துக்குமாா் அளித்த மனு: திருநெல்வேலி நகரம் சுவாமி நெல்லையப்பா் நெடுஞ்சாலையில் மாவட்ட கல்வி அலுவலகம் செயல்பட்டு வந்த பழமையான கட்டடத்தில் அண்மையில் தீ விபத்து ஏற்பட்டு பாழாகியுள்ளது. விடுமுறை நாளில் நடந்ததால் உயிா் சேதம் மற்றும் பொருள் சேதம் குறைந்துள்ளது. இருப்பினும் இந்தச் சம்பவத்தை முன்னுதாரணமாக எடுத்துக்கொண்டு, திருநெல்வேலி பகுதியில் உள்ள பாழடைந்த கட்டடங்களை கணக்கிட்டு அவற்றில் எவ்வித விபத்துகளும் ஏற்படாத வகையில் தடுக்க மாநகராட்சி நிா்வாகம் உடனடியாக நடவடிக்கை எடுக்க வேண்டும்.
பேட்டை முஹம்மது நயினாா் பள்ளிவாசல் சாா்பில் அளிக்கப்பட்ட மனு: எங்களது பள்ளிவாசலைச் சோ்ந்தவா்கள் இறந்தால் அடக்கஸ்தலத்திற்கு கொண்டு செல்ல கருவேலன்குளம் வழியாக உள்ள மண்பாதையை பயன்படுத்தி வருகிறோம். இப் பகுதியில் பாதாள சாக்கடைக்கான குழாய்கள் பதிக்க திட்டமிடப்பட்டுள்ளது. அவ்வாறு பதித்தால் பொதுமக்களுக்கு பல்வேறு இடையூறு ஏற்படும் நிலை உள்ளது. ஆகவே, பாதாள சாக்கடைக்கான குழாய் பதிக்கும் பணியை மாற்றுப்பாதையில் செய்ய நடவடிக்கை எடுக்க வேண்டும் என வலியுறுத்தப்பட்டிருந்தது.
